Бу көнне

1989 ел, 13 апрель

Каты кисәтелделәр

Административ комиссия утырышында урамнарның чисталыгы, санитария торышы турындагы мәсьәлә тикшерелде. Комиссия председателе Н.Галиев кайбер гражданнарның үзләре яши торган тирәлеккә һәм урамнарга чүп-чар, юынтык сулар түгүен каты тәнкыйтьләде.

– Ф.Рәшитов урамына зур чыгымнар тотып асфальт салынды. Анда яшәүчеләр өлкән яшьтә булуларына да карамастан әлеге төзеклекнең, матурлыкның кадерен белмиләр. Ихатадагы барлык чүп-чарны, ашамлык калдыкларын, хәтта көл-күмерләрен дә капка төпләренә генә чыгарып түгәләр. Урамга агач-таш материаллар өяләр, – диде ул. Утырышта ике көн эчендә капка төпләрен, үз җирлекләрен тәртипкә китерергә, дигән карар кабул ителде.

М. Галиуллина,  Мөслим поселок советы башкарма комитеты секретаре.