Суд карары чыкты

Май аенда 18 райондашыбыз спиртлы эчемлекләр кулланып руль артына утыр­ган өчен җәмәгать суды алдына басты.

12 май көнне мировой судья спиртлы эчемлекләр кулланган хәлдә руль артына утырган Фәтхетдинова эшен карады. Ул үзенең гаебен таныды.

– Күрәсең, ДАИ хезмәткәрләрен күрми үтеп киткәнмен. Күпфатирлы йортлар ишегалды­на кереп туктагач, арттан ДАИ хезмәткәрләре килеп туктады һәм машина йөртү документ­ларын сорады. Алкотестерга өрергә тәкъдим иттеләр, күрсәткечләр уңай булды, – диде ул, кыенсынып.

Райондашыбызның канында спиртның ти­ешле нормадан күбрәк булуы ачыкланган. Гаепләнүче моңа аның озак вакытлар дарулар куллануы сәбәпче дип аңлатты.

– Закон алдында бөтен кеше дә тигез. Бик күпләр спирт исе килүен һәм приборда алко­голь ачыклануын белгәч, “дару эчтем” дияргә ярата, – ди районның ДАИ җитәкчесе Айнур Хәйретдинов.

Административ җинаять кылганы өчен Фәтхетдиновага суд тарафыннан 30 мең сум штраф билгеләнде һәм бер ел да сигез айга транспорт белән идарә итү хокукыннан мәхрүм итү турында карар чыгарылды. Суд ба­рышында райондашыбызның юлда тизлекне арттырганы өчен берничә мәртәбә штрафка тартылуы да билгеле булды.

Фото - Pixabay.com