Мөслим марафончылары

Галимнәр фикеренчә, кимендә 21 көн дәвамында көн саен кабатланган гамәлләр ихтыяр көче нык булган кешедә матур гадәткә әверелә ала. Соци­аль челтәрләрдә әлеге фак­тны исәпкә алып оешты­рылган татар телле үзүсеш проектлары барлыкка килде. “Әдәби марафон”, “Сәламәт иртә”, “Авылым гүзәллеге” кебек марафоннар – шун­дыйлардан. Алар “Татнетны үстерү фонды” коммерцияле булмаган оешмасы һәм аның директоры Раил Гатауллин инициативасы белән оешты­рыла. “Әдәби марафон” 2017 елдан башлап үткәрелә, кал­ганнарына 2020 елда старт бирелде. Бөтен дөньяда яшәүче татарлар катнаша алучы әлеге үзенчәлекле бәйге онлайн формада үтүе белән отышлы.

Әлеге проектларда оеш­кан көннәреннән башлап кат­нашучы мөслимлеләр дә бар. Гөлнара Хәкимова, Гөлназ Җәлилова – “стажлы” ма­рафончылар. Марафонда катнашучыларның сафлары арта барып, быел аларның саны 30га якынлашты. Иң нәни ма­рафончы Асылъяр Хәсәновага 8 яшь булса, иң өлкән кеше Әлфия Ибраһимовага – 70 яшь. Нинди һөнәр иясе, ничә яшьтә булуы һәм кайсы авыл­да яшәвенә карамастан, уртак идея, бер максат берләштерә марафончыларны: барысы да әдәбиятны ярата, китап укый, сәламәтлеген кайгырта, үзендә яхшы гадәт формалаштыру өстендә эшли, рухын ныгы­та. Тагын бер мөһим фактор – алар туган телләрендә аралаша һәм интернет челтәрендә татар телле контент булдыру өстендә хезмәт куя, матур гадәтләргә башкаларны да өйрәтә.

Быел алар Мөслимдә берен­че тапкыр үзләре өчен кече сабантуй оештырды. Узган ел марафончылар барлык фи­налистларны туплаган Арча әдәби сабантуенда очраш­ты, быел мөслимлеләр ямь­ле Ык буенда үзара якыннан­рак танышырга булды. Мара­фончыларны район Башкар­ма комитеты җитәкчесе урын­басары Марина Бәдретдинова сәламләде.

– Туган телен, әдәбиятны яраткан кешенең күңеле һәрвакыт чиста, якты була. Болай туплана алган кешеләр киләчәктә зур эшләргә сәләтле. Сафларыгызның киңәюен те­лим, – диде ул.

Кече сабантуйда оешты­рылган традицион уеннарда олысы-кечесе, яше-карты – ба­рысы бергә күңел ачты. Һәркем бүләкле булды. Гаилә белән килүчеләр дә шактый иде. Ки­тап сөючеләр арасында ши­гырь сөйләүчеләр булмый ка­ламыни?! Тат. Бүләр авылын­нан марафоннарда тормыш иптәше Мөхәммәтнур Вахи­тов белән бергә катнашкан Гөлнур Салихова Клара Була­това шигырен сөйләп шакка­тырды. Рүзәл Минһаҗевның гаиләсе белән сабантуй­га килүе сюрприз булды. Ул, ярышларда катнашып, шаян- тапкыр сүзләре белән бәйрәм рухы тудырды, шигырьләрен укып, күңелләрне канатлан­дырды. Эльза Хисамиева баш­каруындагы дәртле җырлар чараның бизәге булды. Рәмилә Дәүләтованың апасыннан отып алган “Әниемә” җырын (авто­ры – В.Әхмәтҗанов) җырлавын беренче мәртәбә ишеттек. Роза Маракина, Миләүшә Хәсәнова, Миләүшә Гәрәева, Рәмилә Дәүләтова – марафончылар­ны берләштереп, чараларда оештырып йөрүчеләр. Очра­шуда катнашкан һәркем алар­га рәхмәтле.

М а р а ф о н н а р н ы ң читләр күзенә күренмәгән үзенчәлекле ягы бар. “Әдәби марафон”да һәркем үзе укы­ган китаптан иң кызыклы өзекләр белән башкаларны җәлеп итә, китап уку теләге уята. “Сәламәт иртә”дә катна­шучылар иртән йөгереп кереп, башкаларга үрнәк күрсәтә. Һәр көнне яңа маршрут сайлар­га тырышып, җирлегебезнең иртәнге матурлыгын бөтен дөньяга таныта. 2020 елда “Авылым гүзәллеге” мара­фонында катнашкан Чулпан Минһаҗетдинова Баланлының иң матур урыннары, иң уңган кешеләре турында кызыклы итеп сөйләп шаккатырган иде. Мөслим марафончылары мес­сенджерларда аралашып тора, бергәләп киләчәкккә планнар кора, укыган әсәрләре турын­да фикерләре белән уртакла­ша. “ВКонтакте” челтәрендә “Без Мөслимнән” исемле үз төркемнәре дә бар.

Матурлыкны күрә, күрсәтә белгән кешеләр үзләре артын­нан башкаларны да ияртергә сәләтле. Марафончыларның һәрберсе дустына, күршесенә, хезмәттәшенә, туганы­на теләктәшлек күрсәтеп килгән. Фикердәшләр туплан­ган җирдә игелекле эшләр туып тора. Киләчәктә яңа ма­рафоннар оештырылачак. 1 июльдән 18 яшькә кадәр ба­лалар өчен ХХ Дөньякүләм “Әдәби марафон” башлана. Сез дә кушылыгыз. Рухыбыз­ны камилләштерүгә тагын бер адым ясыйк!

Гөлназ Җәлилова фотосы