Белмәсәң - бел: дисплазия хатын-кыз өчен нәрсәсе белән куркыныч? (ДӘВАЛАУ БУЕНЧА КИҢӘШЛӘР)

Чир профилактик күзәтүләр барышында гына ачыклана. Шуңа күрә һәр хатын-кыз елына бер тапкыр аналык муентыгын каратырга тиеш!

Дисплазиянең төп сәбәпләреннән берсе - хатын-кыз организмында папиллома вируслары булу. Һәркайсы түгел - ә онкологик яктан куркыныч саналган ВПЧ-16 һәм ВПЧ-18 формалары. Статистика күрсәткәнчә, мондый диагнозлы пациентларның 95-98 процентында шушы вирус табылган. Чирнең баш калкытуында башка факторларның тәэсире зур. Алар :

* гормональ үзгәрешләр (менопауза, йөклелек, авырга узмау чаралары куллану, гормонлы матдәләрдән файдалану);

* җенси тормыш белән иртә (16 яшькә кадәр) яши башлау;

* аналык муентыгын җәрәхәтләү;

* җенси юл белән күчкән инфекцияләр;

* тәмәке тарту һәм алкоголь белән мавыгулар;

* стресслар, күп дару эчүләр, хроник чирләр;

* чисталык җитенкерәмәү;

* күп тапкыр бала табу;

* бала төшертүләр;

* организмга А, С витаминнары, микроэлементлар җитмәү;

* аналык муентыгында эрозия, лейкоплакия һәм начар фон булдыручы башка чирләр.

Хатын-кызның һәр унынчысында бу чир яшертен генә уза. Ул авыр форма алганда, җенес органнары кычыта, әчеттереп тора. Якынлык кылганда авырту сизелә, җенес юлыннан күп итеп бүлендек яисә канлы бүлендек килә башлый. 1-2 дәрәҗәдәге дисплазияне участок гинекологы да дәвалый ала. Ә менә авыр формадагысын гинеколог-онколог карый. Чирне бары аның ярдәме белән генә җиңеп чыгарга мөмкин. Мондый очракта хирургларга да мөрәҗәгать итәргә туры килә, дип язалар интернет челтәре кулланучылары.