Баланлы авыл җирлеге сабантуе быел яңа урында һәм яңача узды (ФОТОЛАР)
Баланлы авыл җирлегенең Баланлы һәм Шуганка авылларныда Сабантуй бәйрәмнәре, күп кунаклар җыеп, зур оешканлык белән үткәрелде. Баланлыда мәйдан яңа урында, авылның иң биек ноктасында, авылдашлар бик яраткан, читтә яшәүчеләр сагынып кайта торган Озын тау башына ясалды, дип яза безгә Баланлы авыл җирлеге башлыгы Илүсә Исламова.
Бәйрәмгә әзерлек вакытында Татарстанда экология һәм әйләнә-тирә мохитне саклау елы уңаннан чигелгән сөлгеләргә конурс игълан ителгән иде. Кызлар-ханымнар күңел җылысын, күз нурларын салып, милли орнаментлар белән бик матур сөлгеләр чигеп алып килделәр. Алар белән туры баганаларны бизәдек, бүләк җыярга чыккан ат хуҗасына тапшырдык.
Шуганка авылында зур кәстрүлгә салынган катык эченнән әйбер эзләү уены традициягә әйләнеп бара, бу бәйге катнашучыларда да, тамашачыларда да зур кызыксыну уята. Агач атларда мәйданны әйләнү дә бар халыкның күңелен күтәрде.
Баланлы Сабантуй мәйданында яңалыклар күп булды, авыш баганага менүчеләрне бер түгел, ике әтәч көтә иде, балалар битләренә бизәкләр, рәсемнәр ясатып кинәнде, аквагрим хезмәте бар теләгән кешегә бушка күрсәтелде. Мәйданны легендар "ГАЗ-5" машинасы бизәде, аның янында рәхәтләнеп фотога төштеләр, өлкәннәр истәлекләрен яңартты. Кибетләр эшләп торды, бәйрәм итәргә, уеннарда катнашырга бар мөмкинлекләр дә тудырылган иде. Бүләкләр өчен "Намус" агрофирмасы, шәхси эшмәкәрләр, кунаклар, авылдашлар спонсорлык ярдәме күрсәтте.
Атлар булмау сәбәпле, ат чабышлары үткәрә алмавыбыз һәм үзебездә зурлардан көрәшчеләр булмау гына күңелне тырнады, әлбәттә. Әмма балалар һәм яшүсмерләр көрәшенең бик кызу баруы киләсе елларда инде мәйданнарда бил алышырдай көрәшчеләребез булачагын күрсәтә.
Следите за самым важным и интересным в Telegram-каналеТатмедиа
Безнең телеграм каналга кушылыгыз! Телеграм-канал
Нет комментариев