Ашыгыч ярдәм бүлегенә 304 чакыру һәм мөрәҗәгать булган

Яңа ел ялларында район үзәк хастаханәсенең ашыгыч ярдәм бүлегенә 304 чакыру һәм мөрәҗәгать булган. 9 көн эчендә 34 кеше хастаханәгә салынган, шуның 23е - балалар. "Көчле ютәл, югары температура белән китерелгән сабыйларның күбесенә пневмония, бронхит диагнозлары куелды. Күпчелек әти-әниләр авыру балаларын өй шартларында дәвалауны кулай күрә. Бу - иң зур хата. Үзлектән дәваламагыз, табиблар белән киңәшми торып, теләсә нинди дарулар эчертү хәлне катлауландырырга гына мөмкин. Балаларда пневмония булуын бары тик рентген кына ачыклый ала", - ди табиблар. Ел башыннан, өч райондашыбызга инсульт булып, алар Әлмәт шәһәре хастаханәсенә илтелгән. Ике бала Кама аръягы балалар үзәгенә дәвалауга салынган.