Югары уку йортларына, техникумнарга һәм көллиятләргә кабул итү кампаниясе старт алды

Россия Федерациясе Хөкүмәте Рәисе урынбасары Дмитрий Чернышенко хәбәр иткәнчә, быел абитуриентлар өчен урта һөнәри белем бирү оешмаларында 880 мең бюджет урыны, ә югары уку йортларында 620 меңнән артык бюджет урыны каралган. Төп игътибар киләчәктә педагоглар, табиблар һәм инженерлык өлкәсендәге белгечләр әзерләүгә юнәлтелә.

Быелдан башлап югары уку йортларына документларны электрон рәвештә тапшыруның бердәм ысулы – РФ дәүләт хезмәтләре порталындагы «Вузга онлайн керү» сервисы. Шул ук вакытта абитуриентлар өчен документларны шәхсән университетка килеп тапшыру яки почта аша җибәрү мөмкинлеге дә саклана.

Югары уку йортын һәм белгечлекне сайлауны җиңеләйтү, шулай ук БДИ балларын узган еллардагы узу баллары белән чагыштыру өчен дәүләт хезмәтләре порталында «Югары уку йортын сайлау» сервисы да эшли башлады.

Быелгы яңалыкларның берсе – «тынлык көннәре». 3 һәм 7 августта, университетлар кабул итү турында боерыклар чыгарган вакытта, абитуриентлар үз гаризаларына һәм укырга керүгә ризалыкларына үзгәрешләр кертә алмаячак (мәсәлән, аларны кире ала алмаячак). Бу чара бюджет урыннарын саклап калырга һәм соңгы мизгелдә гаризаларны кире алу аркасында бушаган урыннарны вакытында башка абитуриентларга бирә алмау очракларын булдырмаска ярдәм итә.

Фото – ясалма фәһем.