Узган елда Татарстанда соңлап бала табу рекордлары

Республиканың иң өлкән анасы булып икенче баласын тапкан 57 яшьлек хатын-кыз танылган. Аталар арасында исә 64 яшьлек ир-ат рекордчы булган.

Бу мәгълүматларны ТР Министрлар Кабинетының ЗАГС идарәсе башлыгы Эльвира Әхмәтова ведомствоның йомгаклау коллегиясендә җиткерде, дип хәбәр итә «Республика Татарстан» газетасы.

Шул ук вакытта, Әхмәтова сүзләренчә, бала табу өчен иң актив яшь үзгәрешсез кала: аналарда бу — 25–29 яшь, аталарда — 30–34 яшь.

Шулай ук ведомство башлыгы күпбалалы гаиләләр турында да сөйләде. Бүген Татарстанда мондый гаиләләр саны 59 меңгә җиткән. 2025 елда алты гаиләдә — унынчы, өч гаиләдә — унберенче, ике гаиләдә — уникенче, ә бер гаиләдә ундуртенче бала дөньяга килгән.