Үзебез дә балаларча сөенәбез

Булат Солтанов, балалар сәнгать мәктәбе укытучысы:

– Балалар арасында эшләгәч, аларның ихластан шатлануларын күреп, үзем дә сөенәм. Шуңа, Кыш бабай ролен башкарырга тәкъдим иткәч, бик теләп ризалаштым. Яңа ел бәйрәме – балалар өчен генә түгел, өлкәннәр өчен дә тылсым тудыручы, яңа хыяллар бүләк итүче бәйрәм. Чакырылган һәр йортка аяк басканда, Кыш бабай буларак, балаларда да, өлкәннәрдә дә соклану уятасы килә. Балалар, безне күреп, чын күңелдән Кыш бабайга ышана, ихластан шатлана. Безгә дә бик күңелле! Кыш бабай алып килгән бүләкләр арасында кыйммәтлесе дә, гадиләре дә була. Күпчелек әти-әни бүләкләрне баланың теләген истә тотып, Кыш бабайга язган хаты нигезендә әзерли. Кыш бабай кулыннан бала үзе көткән бүләкне алса, шатлыгыннан сикерә, куана, бии. Ә без шундый куанычлы, бәхетле мизгелләр бүләк итә алуыбызга сөенәбез. Кайтыр юлга чыккач та, Кар кызы белән шушы өйдә алган кичерешләрне уртаклашабыз.

Иң күп чакырулар 30-31 декабрьдә була. Гыйнвар башында да чакырулар килә. Райондашларыбыз ышанып чакырганнар икән, без аларның ышанычын акларга тиеш.

1 гыйнварда без, һәр елны гаиләбез белән бергә җыелып, бәйрәм киче үткәрәбез. Мин, Кыш бабай костюмын киеп, эне-сеңелләребезне, өлкәннәрне котлыйм, бүләкләр өләшәм.

Фото – «Мөслим-информ» архивыннан.