Спортта сынатмыйлар

Агымдагы елда Мөслим районы хакимияте командасы беренче тапкыр Татарстан Республикасы муниципаль хезмәткәрләре спартакиадасында катнашты.
Ел дәвамында муниципаль берәмлекләр 10 спорт төрендә көч сынашты. Ярышлар нәтиҗәләре буенча Мөслим 18 авыл районы арасында 5 нче урынны яулады!
7-8 декабрьдә җиңел атлетика, шахмат, бадминтон, йөзү буенча ярышлар узды. Командаларыбыз йөзү, бадминтон буенча 3 нче урынны алдылар һәм спартакиаданы йомгаклау тантанасында катнаштылар.
Район башлыгы Альберт Хуҗин үз социаль челтәр битләрендә "Безнең команда үз үрнәгендә район хакимияте хезмәткәрләренең сәламәт тормыш рәвеше яклы булуын дәлилләде", - дип билгеләп үтте. Спорт уеннарында катнашкан һәм  җиңүгә үз өлешен керткән һәркемгә, спортчыларны әзерләгән тренерларга рәхмәт сүзләрен җиткерде. 

Фото - район хакимиятенең матбугат хезмәте архивыннан