Сабантуй мөбарәк булсын!

Бу атнада авыллар­да халкыбызның мил­ли бәйрәме – Сабантуйлар уза. Мөслим районы баш­лыгы Рамил Муллин белән бәйрәмгә әзерлек турында сөйләштек.

– Сабантуйны элек- электән язгы кыр эшләре төгәлләнгәч үткәргәннәр. Сөйләшүебезне дә авыл хуҗалыгыннан башлыйк әле, Рамил Хәмзович: игеннәр то­рышына нинди бәя бирәсез?

– Районда 100 мең гектар­дан артык авыл хуҗалыгы җирләре бар, шуның 83 мең гектары – сөрүлек җирләре. Быел 35 мең гектарда – бөртекле, 15 мең гектарда техник культуралар чәчелде. Язгы чәчүне, элиталы орлы­клар кулланып, күп итеп аш­лама кертеп, башкардык. Ты­рыш хезмәтләре өчен авыл хуҗалыгы хезмәтчәннәренә зур рәхмәтемне җиткерәм. Быел зур уңыш алырга өметләнгән идек, тик, кызга­ныч, яңгырлар булмау сәбәпле без көткән нәтиҗә булмаячак.

– Аномаль һава торышы терлек азыгы әзерләүдә дә кыенлыклар тудыргандыр?

– Әйе, узган ел белән чагыштырганда, азык культураларының уңышы бермә-бер, урыны белән ике- өч тапкыр кимрәк. Бүген 400 мең тоннадан артык печән әзерләнде, сенаж әзерләү бара. Тик яңгырлар булмау терлек азыгының да күләмен киметә. Шуңа күпьеллык үлән басула­рын өстәмә тукландыра баш­ладык. Аллаһы Тәгалә на­сыйп итеп, яңгырлар тәэсире белән үләннең икенче катын­нан җитәрлек күләмдә терлек азыгы әзерләргә өметләнәбез.

– Рамил Хәмзович, терлекчелектә эшләр то­рышы ничек? Мөслимдә ит җитештерүнең нигезен тәшкил иткән кошчылыкка да тукталсагыз иде.

– Узган ел “Август” компа­ниясе зур проект башлады: Үрәзмәттә, зур инвестицияләр кертеп, роботлаштырыл­ган терлекчелек комплек­сы төзелә. Комплексның 1200 башка исәпләнгән берен­че чираты сафка басты инде. 50шәр литр сөт бирүче токым­лы маллар кайтарылды. Мон­нан тыш терлекчелек белән шөгыльләнүче гаилә фермала­ры, шәхси хуҗалыклар да бар. Узган ел белән чагыштырган­да, терлекчелектә 6-7 процент үсеш белән барабыз. Кошчы­лыкка килгәндә, бу юнәлештә 35 мәйданчык эшли. Кошчы фермерлар ярты ел эчендә 1,5 млн чамасы кош-корт үстереп сатты. Үсеш – 12 процент. Кош­чылыкка яңа фермерлар килүе дә сөендерә. Рафаэль Гыйма­ев, Михайловкада җимерек фермаларга реконструкция ясап, зур комплекс булдыр­ды. Киләчәктә ул сугым цехы да ясарга планлаштыра. Кош- кортны эшкәртеп, әзер про­дукция итеп сатуга чыгару күздә тотыла. Киләчәктә башка кошчы фермерлар да, үзләре үстергән кош-кортны шушы цех аша үткәреп, продукция итеп сатсалар, бу җирлек өчен тагын бер үсеш булачак.

– Быел Мөслимдә Бөтенроссия татар авыллары Сабантуе узачак. Районның Сабантуйга, кунак каршы алырга әзерлеген ничек бәялисез?

– Бөтенроссия татар авыл­лары Сабантуена күләмле эшләр башкарылды. Сабантуй мәйданы ясалды. Анда ике ам­фитеатр, ипподром эшләнде, сәүдә урыннары, өстәмә юл­лар, тротуарлар ясалды. Со­циаль объектлар ремонтлан­ды. Мөслим тагын да мату­райды. Узган ел федераль бюджет хисабына 50 млн сум­га балалар сәнгать мәктәбен ремонтладык. Мәгариф хезмәткәрләренең респу­блика август киңәшмәсенә Яр Чаллы юнәлешендә юл­ларны ремонтлаган идек. Быел Актаныш, Әлмәт, Аз­накай юнәлешендә эш бара. Зур проектлар җирлеккә зур инвестицияләр дә кертә. Бүген Сабантуй мәйданында чистарту, җыештыру эшләре бара. Халык, бәлки, арып та киткәндер. Тик, мәшәкате күп булса да, барысы да үзебез өчен эшләнә, районда кала. Сабан­туй үткәреп, кунаклар кабул итеп, милләтебезне, туган те­лебезне саклауга һәм үстерүгә үзебездән зур өлеш кертәбез.

– Рамил Хәмзович, бәйрәмгә күпме кунак килүе көтелә?

– Сабантуйга 50 меңгә якын кеше килер, дип фаразлыйбыз. Күрше шәһәрләрдән һәм рай­оннардан, күрше Башкортстан Республикасыннан кунаклар килер, дип көтәбез. Бөтендөнья татар конгрессыннан гына да 500гә якын делегат киләчәк. Татар сәүдәгәрләрен көтәбез. Шулай итеп кунаклар гына да 2 меңгә якын булыр, дип фараз­лыйбыз. Безнең төп мәйданда 5 мең кеше утыра ала. Ба­сып торучылар белән бергә мәйданның 30-50 мең кеше сыйдыру мөмкинлеге бар. Мондый зур Сабантуй мәйданы республикада түгел, Россиядә дә юк. Күпердән Сабантуй мәйданына кадәр мәйдан күләме – 276 гектар. Дуслары­гызны, туганнарыгызны ча­кырыгыз, һәр кешегә урын бу­лачак.

– Сабантуйга мөслимлеләр кертелми икән, дигән сүзләр дә ишетелә...

– Төп кунаклар, әлбәттә инде – мөслимлеләр! Дөрес, райондашларыбыз, беренче чиратта – бәйрәм хуҗалары, кунак кабул итәбез. Йортыңа кунак чакырып, үзең өйдән чыгып китмисең бит инде. Шуңа, кунакханәләр җитмәү сәбәпле, райондашларыбызга кунакларны үз йортларында кундыруны сорап мөрәҗәгать иттек. Аллага шөкер, 400гә якын райондашыбыз куна­кларны өйләрендә кунды­рырга теләк белдерде. Бу эштә ярдәм итәргә теләүчеләр иҗтимагый совет рәисе Рушат Солтановка, Башкарма комитет җитәкчесе урынбасары Мари­на Бәдретдиновага мөрәҗәгать итә ала. Омск, Чиләбе һ.б. өлкәләрдән татар мохитенә сусаган кунаклар килә. Алар, Мөслимне, татарларның көнкүрешен, тормышын күреп, кунак булып, халкыбызның күңел җылысын алып китә ал­салар, бу Татарстаннан читтә яшәүче милләттәшләребезгә бер этәргеч булыр иде.

– Бу атнада сабантуйлар авылларда гөрләячәк. Рай­ондашларыбызга бәйрәм уңаеннан теләкләрегез, әйтер сүзләрегез бардыр, Ра­мил Хәмзович.

– Сабантуй ул – татарлар­ны бергә туплаучы, дуслар­ны, туганнарны җыючы мил­ли бәйрәм. Узган ел коронави­руска бәйле Сабантуен үткәрә алмадык, быел, Аллага шөкер, бәйрәм узачак. Авылларыбыз матур, төзек һәм бәйрәмгә зур әзерлек белән килә. Барлык райондашларны, районыбыз кунакларын ихлас күңелдән бәйрәм белән тәбриклим. Илләр – тыныч, дөньялар имин булсын! Райондашларыбызга сәламәтлек телим. Дус-тату, бердәм булып, бәйрәмнәрне матур итеп үткәрергә язсын.

Римма Афзалова.

Фото – "Мөслим-информ" архивыннан.