Мөслимдә патологоанатомия бүлеген төзи башладылар

Мөслим район үзәк хастаханәсе территориясендә "Азнакай Нефтемаш заводы" җәмгыяте эшчеләре патологоанатомия бүлеге өчен субайлар урнаштырды. Бер катлы модульле бина көзгә сафка басачак. "Биредә үлемгә китергән чирнең диагнозы ачыкланмаган яисә шик тудырган очракта мәетләрне ярачаклар. Ә инде кешене үлемгә китергән сәбәпләр билгеле булмаса яки аның дөньядан үз үлеме белән китмәү шиге булса, мәет суд-медицина экспертизасына җибәреләчәк. Бүгенгәчә мәетләрне ярырга Бөгелмә шәһәренә алып баралар. Безнең районга Азнакай судмедэкспертлары хезмәт күрсәтә", - ди районның баш табибы Рамил Морзаханов.