Көрәшсез булмый!

– Беренче җиңүләр, берен­че җиңелүләр беркайчан да оны­тылмый. Илнар татарча көрәш белән шөгыльләнүче өметле укучыларымның берсе иде. Беренче ярты елда ярышларда урыннар алмаса да, төшенкелеккә бирелмәде. Тагын да үҗәтләнебрәк шөгыльләнә, үзе өстендә ныклап эшли башлады, – дип искә ала район яшьләр белән эшләү һәм спорт бүлеге җитәкчесе Илшат Яббаров. – Ак­танышта ТР Президенты кубогына уз­ган ярышлар истә калган. Илнар шун­да: “Җиңсәм дә, җиңмәсәм дә, көрәшне ташламыйм”, – дигән иде.

Мәктәптә яхшы билгеләргә генә укыган егет спорт ярышларында да сынатмый. Милли көрәшне ярату нәселдән дә киләдер. Мәрхүм туган­нары Илгиз Гыйзетдиновның, Ил­дар Шәймиевнең районда танылган көрәшчеләр булуын беркем дә инкарь итмәс.

– Илнар улым көрәш белән шөгыльләнә башлагач, башта­гы мәлләрдә “максаты бар, вакы­тын теләсә ничек уздырмас” дип сөендем. Михайловка урта мәктәбенә йөреп укыды ул. Аннан кайту белән дәресләрен караштыра да, узгынчы машинага утырып, Мөслимгә – тре­нировкага китә иде. Соңрак, көрәштә җәрәхәтләр ала башлагач, көрәшне ташлавын сорадым. “Әни, синең, шо­колад күргәч, ашыйсың киләме? Ми­нем дә шулай нык көрәшәсе килә!” – дип җавап бирде, – ди әнисе Альби­на апа. – Улымның Сабантуйлардан, ярышлардан бүләксез кайтканы юк. Өйдәге электр җиһазларының бары­сы да – улым көрәшеп алган бүләкләр.

Мәктәпне тәмамлагач, Яр Чаллының автомеханиклар әзерләүче көллиятендә укуын дәвам итә Ил­нар. Хәрби хезмәткә китәр алдыннан, Мөслим һәм Сарман районнары хәрби комиссариаты юлламасы белән Сар­ман политехника техникумында эре­теп ябыштыручы, машина йөртүче һөнәрләрен үзләштерә. Хәрби буры­чын Оренбург өлкәсенең стратегик билгеләнештәге ракета гаскәрләрендә уза. Армиядән кайткач, район эчке эшләр бүлегенә эшкә урнаша. Башта бүлекнең вакытлыча тоту изолято­рында – постовой, аннары кинолог булып эшли. Бүген ул оператив дежур ярдәмчесе булып хезмәт итә.

– Беренче откан бүләгем картина иде. Аны әни һаман да кадерләп са­клый. 6 сыйныфта укыганда Түбән Табын мәктәбендә татарча көрәш бу­енча ярышлар узды. Шул бәйгедән бүләк белән кайтуыма сөенгәнем әле дә истә. Татарча көрәш белән шөгыльләнү миңа гел ярдәм итте. Армиягә дә физик яктан әзерлекле булып киттем, – ди Илнар.

Мөслим Сабантуенда яшьләр ара­сында узган көрәштә имгәнү ала Илнар. Көндәшен күтәреп ата да, келәмгә җайсыз төшеп, кулын сын­дыра. Бәйгедә беренче урын ала Ил­нар, ләкин абсолют батыр булу өчен көрәшә алмый.

– Сынган кул белән хәлиткеч ярышка чыга алмадым. Тик мин бер­кайчан да бернәрсәгә дә үкенмим. Та­тарча көрәшне җаным-тәнем белән яратам. Ул минем өчен – яшәү рәвеше, тормышта стимул булып тора, – ди Илнар.

Тормыш иптәше Фәридә дә – рай­он эчке эшләр бүлеге хезмәткәре. Биш яшьлек уллары һәм 1 яшьлек кыз­лары үсә. Искәндәр дә әтисе кебек көрәшкә тартыла. Илнар улын берен­че көрәш алымнарына өйрәтә, аның шөгыльләнүен күзәтергә ярата.

Тойгелде авыл җирлегендә узган Сабантуйларда җиңүче булып калыр­га гадәтләнгән егет быел да сынатмас!

Лилия Шәймиева.

Фото – Илнар Салиховның шәхси архивыннан.