15 февраль – татар шагыйре, Советлар Союзы Герое Муса Җәлилнең туган көне

Муса Җәлилнең шигырьләре, аның патриотик темалары һәм фидакарьлеге, халык арасында зур популярлык казанды. Ул фашизмга каршы көрәштә катнашып, үзенең батырлыгы белән тарихта мәңгегә калдырды. Аның иҗаты бүгенге көндә дә актуаль булып кала, яшь буынга илһам бирә.

Бала йокысы

Ак мамык мендәрнең
Эченә күмелеп,
Ул йоклый, төсенә
Сокланып үләрлек!

Күкрәген тутырып
Еш, иркен сулаудан
Ал бәрхет ирене
Аз гына суланган.

Битләре — пар алма,
Миләүшә — керфеге.
Тир белән чыланган
Ефәк чәч бөртеге.

Өстеннән ул тибеп
Очырган юрганын.
Өч бөртек кашын да
Җыерган булган ул!

Бадианмы, нәркисме —
Хуш исле кочагы!
Куенында, билгеле,
Иң сөйгән курчагы.

«Шылт» иткән тааыш юк,
Бүлмәдә шундый тын.
Кешеләр сөйләшә
Үзара шыпыртын.

Чү, акрын! Идәнгә
Нык басып йөрмәгез!
Йокласын туйганчы,
Уята күрмәгез!

Бүлмәдә өч чебен
Бар иде, аны да
Шәл белән кудылар
Өлкәннәр ягына.

Күрегез, никадәр
Кадерле баланың
Йокысы да назлы
Күңленә ананың!

1943, 11 декабрь

Фото – «Татар-информ» архивыннан