Геройлар көне

9 декабрь - Ватан геройлары көне. Шул уңайдан үзәк китапханәдә Мөслим лицееның 11 класс укучылары белән очрашу үтте. Аларга Бөек Ватан сугышы ветераны Әхсән Шәриповның "Утлы еллар аша" һәм өч сугыш кичкән Зариф Мөэминовның "Маҗара" китабына презентацияләр тәкъдим ителде. Чараны алып баручы үзәк китапханә директоры Лилия Садриева тыныч тормышта күрсәтелгән батырлык үрнәкләре турында сөйләде. Китапханәнең халыкка хезмәт күрсәтү бүлеге мөдире Айсылу Мадъярова районыбыздан чыккан геройлар турында сөйләде. Укучылар үзләрен кызыксындырган сорауларны бирделәр.