Медикларга финанс ярдәме

Социаль фондның төбәк бүлекчәсе республика дәүләт учреждениеләренең медицина хезмәткәрләрен гомуми суммасы 496 мең сумнан артык булган өстәмә акча белән тәэмин итте.

Әлеге финанс ярдәме ай саен бирелә һәм сәламәтлек саклау системасында эшләүче 29 меңнән артык кешене колачлый.

Түләү амбулатор звенода һәм ашыгыч ярдәм күрсәтү хезмәтендә эшләүче табиблар һәм шәфкать туташлары өчен аеруча әһәмияткә ия. Әлеге белгечләр пациентларның төп агымы белән очраша һәм интенсив хезмәт режимында эшли. Түләүләрнең күләме 4,5-50 мең сум чикләрендә тирбәлә. Ул хезмәткәрнең категориясенә, медицина учреждениесенең профиленә бәйле. Бу түләү тәҗрибәле белгечләргә дә, яшь табибларга һәм шәфкать туташларына да каралган.

Түләү процедурасына килсәк, медицина оешмалары җитәкчелеге ай саен хезмәткәрләренең реестрын әзерли. Бу документта хезмәткәр, аңа тиешле сумма, хисап өчен нигез булган эшчәнлек күрсәткечләре турында шәхси мәгълүматлар бар. Акча хезмәткәрләрнең банк счетларына җиде эш көненнән артмаган срокта күчерелә. Хезмәткәрнең “Дәүләт хезмәтләре” порталындагы шәхси кабинетында акча күчерү турында белдерү барлыкка килә.

Әлеге социаль түләүләр өлешчә мәшгульлек шартларында эшләүче медицина хезмәткәрләре өчен дә каралган. Моннан тыш, бу акча физик затлар керемнәренә салым салудан азат ителгән һәм хезмәткәрнең уртача хезмәт хакын санаганда да исәпкә алынмый.

– Быел төбәк медицина хезмәткәрләренә 496 мең сумнан артык акча җибәрелде. Әлеге түләүләр медицина хезмәткәрләренең авыр хезмәте өчен сизелерлек ярдәм һәм яшь кадрларга кызыксындыру чарасы булып тора, – дип хәбәр итә Россия Социаль фондының Татарстан бүлеге җитәкчесе Эдуард Вафин.

Фото – Татар-информ