Шагыйрь Харрас Әюпнең тууына — 80 ел

Балачак һәм белем алу

1946 елда Мөслим районы Түреш авылында туа. Башлангыч белемне шунда ала. 1964 елда Күбәк урта мәктәбен тәмамлый. Казан дәүләт университетының татар теле һәм әдәбияты бүлегендә югары белем ала.

Хезмәт юлы

Хезмәт юлын 1969 елда Мөслимнең район газетасында әдәби хезмәткәр булып башлый, соңрак авыл хуҗалыгы бүлеген җитәкли.

1972–1983 елларда «Татарстан яшьләре» газетасы редакциясендә хезмәт куя.

1983 елдан Татарстан китап нәшриятында: матур әдәбият редакциясе редакторы (1983), мөдире (1992), баш мөхәррир (1994) вазифаларын били.

Иҗат сукмагы

Беренче адымнар: Шигырьләрен мәктәптә укыганда яза. Беренче иҗат җимеше 1962 елда район газетасында дөнья күрә. Университетта «Әллүки» иҗат берләшмәсендә тәҗрибә туплый.

Басма әсәрләр: Республика басмаларында һәм күмәк җыентыкларда басыла. Беренче мөстәкыйль китабы 1980 елда нәшер ителә.

Поэзия һәм җыр сәнгате: Поэмалар остасы буларак таныла. Лирик шигырьләре көйгә салына. «Сиңа гына язган хатлар», «Кайда син, гармун?», «Исемеңне язган идем» кебек популяр җырлар авторы.

Мактаулы исемнәр һәм җәмәгать эшчәнлеге

1982 елдан СССР (Россия) Язучылар берлеге әгъзасы. 1994–2005 елларда Татарстан Язучылар берлеге идарәсе әгъзасы.

1994 елда «Татарстан Республикасының атказанган сәнгать эшлеклесе» дигән мактаулы исем бирелә.

Фото: Мөҗәһит Әхмәтҗановның шәхси архивыннан алынган.

Безнең телеграм каналга кушылыгыз! Телеграм-канал

Без "Дзен"да! Дзен