Бәкедә су коену гөнаһлардан арындыра

19 гыйнварга каршы төндә православие динендәгеләр Качману бәйрәмен билгеләп үтте. Рус Шуган авылындагы бәкедә су коену мөмкинлеге тудырылган иде. Бу көнне су коенучылар тәннәренә – сихәт, җаннарына шифа ала, гөнаһлардан арына, чирләрдән арына, дигән ышану яши.

Качману төнендә чиркәүдә служба узды. Бәйрәм уңаеннан Рус Шуган авыл җирлеге башлыгы Альбина Басорина православие динен тотучыларны бәйрәм белән котлады.

– Борынгыдан килгән гадәт буларак, православныйлар бәйрәм төнендә чиркәүдә гыйбәдәт кыла һәм төнге уникедән соң бәкедә су керә башлый. Бу көнне чиркәүләрдә су изгеләндерелә, коену өчен елга-күлләрдә бәкеләр ясала. Бәйрәм көнне чиркәүдән алып кайткан изгеләндерелгән су сихри көчкә ия. Бу көнне җыелган су күпме торса да бозылмый, бу могҗизага тиң, – ди Альбина Басорина.

Качмануда су коенырга татарлар да, руслар да килә. “Телләребез төрле булса да, Аллаһ бер”, – ди Яр Чаллыдан кайткан Галина Гафиятуллина.

Лилия Шәймиева фотосы