Витамин җитәме?

Салкын тию, вируслы авырулар йоктыру куркынычының нигә көз азагы һәм кыш айларында артуы турында уйлаганыгыз бармы? Күпләр, вируслы  авырулардан С витамины саклый, дип уйлый. Чынлыкта организмга Д - кояш витамины җитмәү - авыруга еш бирешүгә сәбәпче. Җәен тупланган Д витамины чама белән ике айда сарыф ителә. Ә кояш нурлары җитмәгәндә, аны тулыландыру авыр. Д витамины иммунитетны ныгыта, тиренең сыйфатын яхшырта.

Организмга Д витамины җитмәүнең төп билгеләре: еш авыру, инфекцияле яки вируслы авырулар йоктыру, тиз ару, арка, буыннар, аяклар авырту, буыннар хәлсезләнү, депрессиягә бирешү, тирләү, күңел төшенкелеге.

Д витамины йомырка, майлы дингез балыгы, дингез ризыклары, тәрәч балыгы бавыры, сөт, эремчек, атланмайда куп. Күбрәк саф һавада, кояш астында йөрергә кирәк.

Наилә Сәлахова фотосы