Әмәкәй авыл җирлегендә былтыр 440 мең сум үзара салым җыелган

Әмәкәй авыл җирлегендә былтыр 440 мең сум үзара салым җыелган. Шуның хисабына бөтен проблемалар вакытында чишелеш тапкан.
– Акчаның дәүләттән кайткан өлеше тотылып бетте. Хәзер үзара салым программасы үзгәрәк, масштаблы эшләр планлаштырып булмый. Булган акча көнүзәк мәсьәләләләрне хәл итү: су белән тәэмин итү, урамнарны яктырту, җәйге һәм кышкы чорда юлларны карап тоту өчен юнәлтелә. Әмәкәй авылында Сугышчан батырлык обелискына ремонт башкарылды, тирә-юненә брусчатка түшәлде, – диде җирлек башлыгы Илнара Шакирянова.
Татарстан Республикасында авыл юлларын һәм торак пунктлар урамнарын норматив хәлгә китерү өчен, вак таш-ком катнашмасыннан юл салу программасы эшли. 2024 елда Әмәкәй авыл җирлегендә авылга керә торган юлның 350 метрына ремонт ясалды. Программа быел да дәвам итәчәк. Район башлыгы инициативасы белән быел 9 авыл җирлегендә юллар ремонтланачак. Әлеге авыл җирлекләре арасында Әмәкәй дә бар. Быел әлеге программа нигезендә Әмәкәйнең Киров, Ленин урамнарының бер өлешендә һәм Революция урамында юл ремонты планлаштырыла.

Фото: район хакимиятенең матбугат хезмәте