Түбән Кама шәһәрендәге 37 нче лицей җыештыручысына 500 мең сум түләнәчәк

Түбән Кама шәһәренең 37 нче лицее техник хезмәткәре Алсу Әнәсовaга, укучы тарафыннан кылынган һөҗүм нәтиҗәсендә зыян күргән өчен, 500 мең сум күләмендә акчалата компенсация түләнәчәк. Бу хакта Түбән Кама муниципаль районы башлыгы Радмир Беляев дүшәмбе җыелышында хәбәр итте.

Аның сүзләренчә, мәктәп хезмәткәренең кыю һәм тәвәккәл гамәлләре һөҗүм итүченең игътибарын читкә юнәлтергә мөмкинлек биргән, шунл сәбәпле авыррак нәтиҗәләр һәм корбаннар булудан сакланып калганнар.

Район башлыгы билгеләп үткәнчә, Алсу Әнәсовaның гомеренә куркыныч янамый, ул табиблар күзәтүе астында.

Шулай ук лицейның педагогик һәм административ коллективының оператив эш итүе билгеләп үтелде. Куркыныч янаган вакытта директор урынбасары радио аша «тревога» игълан иткән. Укытучылар һәм укучылар кабинетларда яшеренгән, ишекләрне бикләгән һәм Росгвардия һәм махсус хезмәтләр килгәнче имин урыннарда калган.

Түбән Камадагы лицейда инцидент 22 гыйнварда теркәлде. 7 нче сыйныф укучысы мәктәп бинасына пычак алып кереп, техник хезмәткәрне яралаган, аннары сигнал җайланмасыннан атып җибәргән. Вакыйга нәтиҗәсендә үзе дә җәрәхәтләр алган.

Һөҗүмче Росгвардия хезмәткәрләре тарафыннан тоткарланган һәм медицина учреждениесенә озатылган, хәзер ул табиблар күзәтүе астында.

Әлеге факт буенча Россия Тикшерү комитеты тарафыннан үтерергә маташу һәм вазифаи салкын караш маддәләре буенча җинаять эше кузгатылды. Хәзерге вакытта үтерү омтылышының сәбәпләре ачыклана.

Мәктәп хезмәткәрләренең вакытында күргән чаралары нәтиҗәсендә укучылар арасында корбаннар булмый калган.

Чыганак: «Татар-информ»

Фото – «Татар-информ» архивыннан.