Каян чыга бу тузан?!

Язгы кояш белән бергә өйдә тузан да күренә башлый. Тәрәзә төбен, өстәл-киштәләрне иртән сөртеп чыксагыз да, кичкә кабат тузан утыра. Тузанга каршы көрәштә берничә лайфхак тәкъдим итәбез.

Өй җыештыруны идән суыртудан башламагыз. Тузан өстән аска төшеп утыра, шуңа күрә иң элек киштә-өстәлләрне җыештырыгыз. Почмакларны сөрткәндә кер кондиционеры куллансагыз, тузаннан саклаучы катлам барлыкка килә. Җиһазларны һәм пәрдәләрнең тузанын суыртыгыз, мендәр-юрганнарны ешрак кагыгыз, иң күп тузан шунда җыела. Диварлардан да сирәк булса да тузан суырту мөһим. Матрасны тузан суырткыч белән чистартып торыгыз, анда микроорганизмнар, тузан талпаннары җыела. Өч-биш ай саен матрасны химчисткага бирү хәерле.

Келәмдә яки диванда май табы булса, анда кукуруз оны сибегез һәм 10-15 минут тотыгыз. Он бөтен майны, пычракны үзенә сеңдерсен. Бераздан онны тузан суырткыч ярдәмендә суыртып алыгыз. Тап бөтенләй бетәчәк яки бик аз гына калачак. Анысын гадәти куллана торган чаралар белән юк итә аласыз.

Белгечләр керне өйдә киптермәскә киңәш итә. Шәхси йортта ишегалдында махсус урын ясарга була, ә фатирда балконда кер киптерү өчен урын булмаска мөмкин. Шулай да керне бүлмәдә киптермәү җаен табарга кирәк, чөнки чиста кердән дә тузан оча. Киптерү өчен компактлы җайланманы ванна бүлмәсенә куярга була. Мөмкинлегегез булса, керне киптерә торган җайланма кулланыгыз. Ул киемдәге бөтен вак тузанны аерым фильтрга җыя. Кием шкафында киштәләрне дә сөрткәләп торыгыз. 

Тузан сөртер өчен шкафта парсыз носкиларны кулланып була. Ике кулыгызга ике носки киеп, тузанлы урыннарны сөртегез. Мондый җайланма жалюзи, батареялар чистартуны җиңеләйтер. Кулланган носкиларны жәлләмичә ташларга була. 

Киемнән чүп җыючы ролик белән плафонны, декоратив салфеткаларны чистартырга мөмкин. Әлеге алым песи йонын җыярга да ярдәм итә. 

Аяк киемен чистарту өчен кулланылучы йомшак губка җиһазларның агач өлешен чистару өчен уңайлы. Губка белән сөрткәннән соң, тузан азрак утырачак. Губкада крем күп булса, аның эзләрен микрофибрадан ясалган коры салфетка белән сөртегез. 

Тәрәзә яки башка пыяла өслек юганда кукуруз крахмалын кулланыгыз. Ул пыяланы бик яхшы чистарта һәм ялтырата. Көзгене дә бозмаячак һәм эзләр калдырмаячак. Бу очракта көзгегә тузан сирәк куначак.

Фото – Мөслим-информ архивыннан