Февральдә нәрсәләр чәчәбез?

Утыртыр алдыннан орлыкларны гөмбәчеккә каршы эремә белән эшкәртегез, туфракны җылытыгыз.

Помидорның иртә һәм уртача өлгерә торган сортларын җылытылган теплицага утырталар. Соң өлгерә торганнарының вегетация чоры 110-140 көн була. Аларның рассадасы ике айдан соң әзер була. Аны шул чакта ачык туфракка утыртырга ярый. Әгәр дә сез үсентеләрне теплицага утыртырга җыенасыз икән, февраль аенда уртача өлгерешле яки иртә өлгерешле помидор сортларын чәчәргә мөмкин.

Баллы борыч рассадасы 2-2,5 айдан әзер була. Ачык туфракка утырту өчен 23 сантиметр биеклектәге үсемлекләр яхшы. Аның борычлары 90-140 көн эчендә өлгерә. Уртача алганда, орлыклар шытсын өчен якынча 7 көн кирәк, шуннан соң беренче шытымнарга аз гына су сибәләр.

Баклажан орлыгы үсеп, рассада булсын өчен ике ай чамасы вкыт кирәк. Бу яшелчәнең дә вегетация чоры озын. Аларның үсеш циклы 100-150 көн тәшкил итә.

Бәрәңгенең сирәк сортларының орлыкларын да утыртырга вакыт җитте. Беренче сезонда бу рассада тавык йомыркасы зурлыгында гына бүлбеләр бирер. Икенче елга исә мул уңыш көтәргә кирәк. Мондый бәрәңге орлыгын утыртканчы, бераз үрдереп алу кирәк. Бәрәңге орлыгы шактый катлаулы үсә. Рассадага 24 градус җылылык, яхшы итеп яктыртылган урын таләп ителә. Бәрәңге рассадасын ачык туфракка көн һәм төн арасында температура тирбәлешләре азайгач кына чыгарып утырту хәерле.    

Порей суганының давегетация чоры озын, ачык туфракка күчереп утырту өчен шытымнар 60 көн эчендә өлгерә. Порей үсентеләрен май башында ук грунка күчерергә мөмкин, чөнки ул салкыннардан курыкмый. Дөрес җылылык режимын гына сакларга кирәк.

Җир җиләгенең беренче елында уңыш җыеп алу өчен аны шулай ук иртә чәчәләр. Җиләк орлыгын гыйнвар азагында яки февраль башында утыртырга кирәк. Ә менә май азагында үсентеләр биш чын яфрак чыгарган вакытта грунтка күчерергә була.

Оксана Исламова фотосы