Балан катыгын ничек ясарга?

— Арыш, куас оны кушып пешергән баланны безнең якта “Балан катыгы” дип йөртәләр. Элек әбиләр аны мичтә пешерә иде. Хәзер көйдерми торган калын төпле савытлар күп. Кайбер кеше балан катыгын куас оны белән генә ясый, әмма арыш оны да кушсаң, тәмлерәк килеп чыга. Чәй белән эчәргә дә яхшы. Баланны болай ашап булмый бит, ә файдасы бик зур.

 Беренче ысул. 4 стакан баланга 3 стакан шикәр комы, 5 стакан су, 1 әр стакан арыш, куас оны салам. 1,5-2 сәгать чамасы сүрән утта плитәдә пешерәм. Болгатып торырга кирәк.

 Икенче ысул. 5 стакан су (куе булса, соңыннан өстәргә мөмкин), 4 стакан балан, 3 стакан шикәр комы, 1 әр стакан арыш, куас оны. Җылымса суга салып, сүрән утта 1,5-2 сәгать пешерергә. 3 стакан гына су кушып пешереп, пирог эчлеге итәргә дә була.
("Ирек мәйданы" газетасы архивыннан).

З.Солтанова фотосы 

Чыганак: Йорт. Бакча. Рецептлар