Ялгышырга хакың юк!

“Татарстанда 2020 елда юл эшләре программасын башкару” һәм “Имин һәм сыйфатлы автомобиль юллары” милли проектларын гамәлгә ашыруга багышланган брифинг узды. Аны ТР транспорт һәм юл хуҗалыгы мини­стры Ленар Сафин алып барды.

Юллар төзү зур чыгымнар сорый

– Татарстанда милли проектка караган барлык объектларда (аларның гомуми саны – 84) узачак төзү-монтаж эшләренә дәүләт контракты төзелде. 31 объектта юл эшләре бара инде, – диде министр.

Министр билгеләп үткәнчә, быел барлы­гы 5,045 млрд сумлык эш башкару планлаш­тырыла, аның 2,602 млрд сумы – федераль бюджеттан, 2,443 млрд сумы – республика казнасыннан.

Безнең җирлеккә килгәндә, “Гомуми кул­ланыштагы юлларда юл эшләре программа­сы” кысаларында “Волга” М7 автомобиль трассасының” Иске Айман-Октябрь юлын­да реконструкция эшләре уздырылачак. Юл эшләре өчен 6 млн сумнан артык средство каралган. Актаныш-Мөслим юлында бер километр озынлыкта – 34 млн сумга якын, Мөслим-Саклаубаш юлында 30 млн сумлык капиталь ремонт эшләре башкарылачак. Үрәзмәт авылы янында төзелүче сөт комплек­сына илтүче юлда 8 млн сумнан артык сумма­га ремонт эшләре көтелә. Мөслим-Иске Сәет юлында бер километрдан артык юл аралы­гында шулай юк өр-яңа асфальт түшәләчәк. Юллар һәм күперләрне карап тоту өчен 74 млн сумга якын акча бүлеп биреләчәк.

Иминлек юллар торышына да бәйле

Быел җирлегебездә 5 юл-транспорт һәлакәте булып, аларда 4 кеше тән җәрәхәте алган, өч кеше вафат булган. Бу хакта комис­сия утырышында районның ДАИ җитәкчесе Айнур Хәйретдинов хәбәр итте. Узган елның шушы чорында бер генә авария булып, бер кеше тән җәрәхәте алган, үлүчеләр булмаган.

– Ел башыннан юл хәрәкәте кагыйдәләрен бозган өчен 1293 административ беркетмә төзелде. Аларның 22се – исерек килеш транс­порт белән идарә иткән өчен, 23е – маши­на белән каршы як полосага чыккан өчен. 23 райондашыбыз машина йөртү таны­клыгыннан башка транспорт белән идарә иткән, 206 (!) шофер куркынычсызлык ка­ешын эләктермәгән булган. Юл хәрәкәте кагыйдәләрен бозган 8 җәяүле дә җавапка тартылды, – ди Айнур Хәйретдинов.

Комиссия утырышында катнашкан рай­он прокуроры урынбасары Рамил Мөхсинов, район эчке эшләр бүлеге җитәкчесе Раил Гатауллин да юллардагы иминлек буен­ча фикер-тәкъдимнәрен җиткерде. Проку­рор урынбасары билгеләп үткәнчә, районы­бызда исерек килеш транспорт белән идарә итүчеләр аз түгел. “Иң борчыганы – алар ара­сында җитәкчеләр дә бар! Берәү дә “Җәзасыз калам” дип уйламасын иде!” – диде Рамил Мөхсинов.

– Юлларны ремонтлаганда алынган ясалма калкулыкларны кабат кую кирәк. “Очып” килгән машина хуҗасы, алда кал­кулык барлыгын күреп, тизлекне кимет­ми калмый. Юлга бала-чага да йөгереп чы­гарга мөмкин, кайчак өлкәннәр дә машина килгәнен абайламый кала. Ремонттан соң юлларны кабул итеп алганда комиссия со­ставына ДАИ хезмәткәрләрен дә кертүне со­рар идем. Яңа микрорайонда күп урыннар­да яңа юл билгеләре, ясалма калкулыклар кирәк. Бүгенге көндә биш данә ясалма кал­кулык кайтты. Мөслимнең Гагарин, Татар­стан урамнарына да кирәк алар. Тротуар­дан төшкәч, юлны чыгу өчен разметкалар да күренеп торырлык булырга тиеш, – диде ДАИ җитәкчесе.

Район эчке эшләр бүлеге җитәкчесе Раил Гатауллин ДАИ хезмәткәрләренә төнге по­стларны тагын да көчәйтергә, ял көннәрендә активлыкны аеруча арттырырга, юлдагы имгәнүләрне һәм һәлакәтләрне киметү мак­сатында төрле операцияләр үткәрүне дәвам итәргә кирәклеген искәртте.

Кәеф-сафа кылып йөрүче яшьләр дә юл­ларда киеренкелекне арттыра. Күңел ачып йөргән, алны-артны уйламаган егет-кыз­лар күп очракта фаҗигале төстә якты дөнья белән хушлаша. Юлга чыккансың икән, ял­гышырга хакың юк!

Лилия Шәймиева.