Ялгышларга урын булмасын!

18 июнь көнне Иске Карама­лы авыл җирлегендә юл-транспорт һәлакәте булды. Пассажир үлеме белән тәмамланган авариянең сәбәпләре ачыклана, шоферга карата җинаять эше кузгатылган. Юл хәрәкәте имин­леге комиссиясе утырышында сүз юл- транспорт фаҗигаләрен кисәтү ту­рында барды.

– Кичке тугыз тулганда Иске Ка­рамалы белән Яңа Карамалы авыл­лары арасында “Хундай-Солярис” машинасы, тизлеген арттырып, юл читенә төшеп тәгәри. Җиңел маши­на дүрт тапкыр әйләнә. Нәтиҗәдә пассажир – 72 яшьлек ир-ат ава­рия урынында вафат була. Машина йөртүче 49 яшьлек хатын-кызның умыртка баганасы сынган. Ул авыр тән җәрәхәтләре белән Яр Чаллы хастаханәсенә озатыла. Һәлакәткә юлыгучылар – әтиле-кызлы, Баш­кортостан Республикасының Туй­мазы районы кешеләре. Авариянең сәбәпчесе буларак, 1973 елгы хатын- кызга карата җинаять эше кузгатыл­ды, – ди районның ДАИ җитәкчесе Ай­нур Хәйретдинов.

ДАИ хезмәткәрләре биргән мәгълүматлардан күренгәнчә, авариядә һәлак булган ир-ат биш-алты ел элек туган авылы Яңа Карамалыга кайтып яши башлаган. Юл-транспорт һәлакәте булган көнне мәрхүмнең кызы әтисе янына кунакка кайткан.

– Борылышта шофер машина белән идарәне югалта. Автомобиль, юлдан төшкәч, тагын 60 метр чамасы бара. Нәтиҗәдә юл билгесе куелган калку­лыкка килеп бәрелә, көчле бәрелүдән “иминлек мендәрләре” ачыла һәм шо­фер аңын югалта. Шофер иминлек ка­ешларын эләктергән булган. Пассажир да иминлек каешын эләктергән булса, бәлки, исән калыр иде, – ди ДАИ ин­спекторы Илнар Гыйздуллин.

11 июнь көнне районда тагын бер юл-транспорт һәлакәте теркәлде. Әлмәт шәһәреннән авыл сабантуе­на кайткан өченче сыйныф укучы­сы өчен бу бәйрәм соңгысы була. Мөслим – Иске Сәет юлында “Фоль­ксваген” автомобиле төп юлдан бару­чы “КИА”га юл бирмәү нәтиҗәсендә җиңел машиналар бәрелешә. Көчле бәрелү нәтиҗәсендә 9 яшьлек кызның гомере өзелә. Баланың әнисе – 43 яшь­лек хатын-кыз тән җәрәхәтләреннән аңына килә алмыйча, Яр Чаллы хастаханәсендә җан бирә.

– Авариядә могҗиза белән исән калган 45 яшьлек ир-ат кы­зын һәм тормыш иптәшен югалт­ты. “КИА” машинасын йөртүче һәм “Фольксваген”дагы дүрт кеше төрле тән җәрәхәтләре белән хастаханәгә озатылды. Авария булган көнне “Фольксваген” шоферының туган­нары белән Тат.Бүләр Сабантуеннан Октябрь Сабантуена баруы булган. Бүгенге көндә “Фольксваген” шофе­ры – 56 яшьлек Яр Чаллы кешесенә карата җинаять эше кузгатылган, – ди Айнур Хәйретдинов.

Утырышта авыл җирлекләре баш­лыкларына халыкка аңлату эшләре алып бару кирәклеге искәртелде. Рай­он Башкарма комитеты җитәкчесе Ирек Салихҗанов билгеләп үткәнчә, кайбер җирлек башлыклары авыл­дагы вакыйгалардан хәбәрдар түгел. Авыл эчендә мопед, мотоцикл белән йөрүче яшүсмерләргә дә игътибар итүче юк.

Мәгариф идарәсе җитәкчесе Ли­лия Хәбибуллина укучыларның җәйге ялы хәвеф-хәтәрсез узсын өчен әти- әниләрнең балаларына игътибарлы булуы кирәклеген искәртте.

– Күп әти-әниләр балаларының ва­кытны ничек үткәрүен белми. Тугы­зынчы сыйныф укучысы белән бул­ган вакыйга күпләргә сабак булыр­га тиеш иде. Яше җитмәгән һәм ску­тер, мопед, мотоцикллар белән идарә итәргә хокукы булмаган егет-кызлар әлеге төр транспортта хәрәкәт итүен дәвам итә. Шушы көннәрдә питбайк­та йөргән ике яшүсмернең әнисенә кисәтү ясалды. Ә алар “без балалары­бызга бу транспортта йөрергә рөхсәт итәбез, питбайк ул – спорт инвентаре генә” дип җавап кайтарды. Бу – әти- әнинең баласының сәламәтлегенә би­тарафлыгы, – ди Лилия Хәбибуллина.

Питбайк – спорт инвентаре. Тик гомуми файдаланудагы юлларда пит­байкта йөрергә ярамый. Басу-кырда йөрергә рөхсәт ителә дип аңласак та, бу транспортны басуга кадәр алып ба­рырга кирәк бит әле! Белгечләр пит­байкта белер-белмәс йөрү яшүсмерләр өчен куркыныч тудыра, ди.

Районның ДОСААФ җитәкчесе Айдар Шәймөхәмәтов “М” категориясенә укырга теләк белдерүче яшүсмерләрнең булма­вын билгеләп үтте. Мотоциклда 18 яше тулган һәм шушы төр транспорт белән идарә итәргә хокукы булганнар гына йөри ала! 18 яше тулып та, мото­цикл белән идарә итү хокукы булмый­ча, әлеге транспортка утыручыларга 5 мең-15 мең сум штраф яный. Бала өчен штрафны әти-әни түли. Моңа өстәп, транспортны балигъ булмаган үсмергә биргән өчен тагын 30 мең сум штраф каралган.

– Скутер һәм мопедларда йөрү өчен “М” категориясе булу кирәк. Мөслим урамнарында мопедта йөрүчеләр әз түгел. Мопедта йөрүчеләрнең бик азы гына “М” категориясенә ия. Бу төр транспортка юл кагыйдәләрен белгән килеш утыру да таманга туры килә, – ди Айдар Шәймөхәмәтов.

Лилия Шәймиева фотосы.