Уттан саклан!

Җәй янгын куркынычын бермә-бер арттыра. Ел ба­шыннан Мөслимдә 13 янгын теркәлгән. Аларда өч кеше һәлак булган, бер кеше авыр тән җәрәхәтләре алган. Уз­ган елның шушы чорында 19 янгын булган.

Мөслим һәм Сарман районнары буенча янгын күзәтчелеге бүлеге инспекто­ры Вильям Тайбактин хәбәр итүенчә, 2022нче елның 8 июненнән янгын куркыныч­сызлыгы таләпләрен һәм ур­маннарда янгын куркыныч­сызлыгы кагыйдәләрен бозган өчен штрафлар күләме арткан.

– Җәй – ял-бәйрәмнәр вакыты. Табигать коча­гында, ишегалдында ит кыздыручылар, күмердә бәрәңге тәгәрәтүчеләр са­клык кагыйдәләрен үтәмәсә, күңел ачу саллы гына штраф китерергә мөмкин. Мангал­да шашлык пешергәндә учак өйдән 5 метрдан якын булса, моның өчен кисәтү яисә 5-10 мең сум күләмендә штраф ка­ралган. Янгынга каршы мах­сус режим гамәлдә булган чор­да штраф күләме ике мәртәбә арта, – ди Мөслим һәм Сар­ман районнары буенча янгын күзәтчелеге бүлеге җитәкчесе урынбасары Илнар Идиятов.

Пикникка чыгу милеккә яки кешегә зыян китерсә, зыян салучыга 40-50 мең сум штраф яный.

– Рейдлар вакытында яшьләрнең тиешсез урында учак ягып җылынуына яисә шашлык кыздыруына тап булган бар. Урманда яки пар­кта тиешле булмаган урын­да учак яккан өчен ел башын­нан алты райондашыбызга кисәтү ясалды. Кисәткәннән соң, табигатькә кабат зыян са­лучылар 15-30 мең сум штраф­ка тартылырга мөмкин. Ян­гынга каршы махсус режим вакытында бу сумма 40-50 мең сум тәшкил итә, – ди Илнар Идиятов.

Янгында сәламәтлеккә зур зыян килсә, хокук бозучыга 80 мең сумга кадәр штраф салына һәм өч елга кадәр рәшәткә ар­тына утыру яный. Янгын кеше үлеменә китергәндә биш елга кадәр төрмә яный, милеккә зур күләмдә зыян килсә – 120 мең сум штраф яки бер елга кадәр иректән мәхрүм итү каралган. Янгын нәтиҗәсендә урманга зыян килсә, хокук бозучыга 300-500 мең сум штраф салына һәм дүрт елга кадәр иректән мәхрүм ителү яный.

17 июнь көнне иртәнге 8.00 сәгатьтә 123 санлы янгын сүндерү бүлегенә Сал. Мухан авылындагы шәхси йортта ян­гын чыгу турында хәбәр килә. Янгын нәтиҗәсендә йортның аш-су бүлмәсенә зыян килә.

– Электр җиһазларын кул­ланганда техника куркы­нычсызлыгы кагыйдәләрен үтәмәү сәбәпле янгын чыккан. Бүгенге көндә тикшерү эше бара. Йорт иминиятләштерелгән. Янгыннарның күбесе электр чыбыгындагы кыска ялга­ныш белән бәйле, – ди Мөслим һәм Сарман районнары буен­ча янгын күзәтчелеге бүлеге җитәкчесе урынбасары Илнар Идиятов.

Фото – “Татар–информ” архивыннан.