Тукай исеме бирелгән Мөслим мәктәбе күрше-тирә район укучыларын Туган тел бәйрәменә җыйды (ФОТОРЕПОРТАЖ)

- Мөслимдәге урта мәктәпкә Тукай исеме бирелү дә юкка түгел. Татар җанлы, татар рухы белән сугарылган шигырләре беркайчан да үлмәс. Шагыйрь үрнәгендә укучылар милләткә хөрмәт һәм ярату белән карарга өйрәнә, - диде район мәгариф идарәсе начальнигы Рафаэль Демидов.

8 команда 8 квестта үзенең осталыкларын, җитезлекләрен сынады. Укучылар шагыйрьнең шигырьләрен рус һәм инглиз телләренә тәрҗемә итте, Г.Тукай сүзләренә язылган җырларны берничә нотадан тану сәләтләрен дә барлады.

Командалар Тукайга багышланган шигырьне аерым сүзләрдән төзү һәм зәвыклы итеп урнаштыру буенча да сынатмады. Татар халкының бөек шагыйре турында күренекле шәхесләрнең фикерләрен белеп, авторларын табу да командаларга бик җиңел бирелде. Бәйгенең тест турын узып, тәкъдим ителгән рифмаларга үзләре теләгән телдә шигырь иҗат итеп, укучылар шагыйрьгә булган ихтирамны тагын бер кат күрсәтеп бирә алдылар. Бәйрәмгә кунак итеп чакырылган язучы Фоат Садриев, балалар шагыйре Мөҗәһит Әхмәтҗанов командаларның әзерлекле, бигрәк тә татар җанлыклы балаларның күп булуына ихлас сөенүләрен белдерделәр. Соңгы квестта командалар Мөслимдәге Тукай проспектын үзләре күзаллаганча тасвирлады. Парк, сквер, аллея, кибет һәм балалар мәйданчыкларына нинди исем бирергә теләүләре белән уртаклашып, киләчәктә җирлегебездә үзләре күрергә теләгән объектлар буенча да фикер-тәкъдимнәрен җиткерде. Капитаннар ярышы аеруча үзенчәлекле булды. Г.Тукай шигырьләрен татар, рус, инглиз телләрендә яттан сөйләп, аның сүзләренә язылган җырларны башкарган капитаннар иң югары бәя алды.

Тукай бәйрәмен мәктәпнең ике катында да әзерләнгән иҗади кул эшләре тулыландырды. Мөслимнең 13 тугызеллык һәм Түбән Табын коррекция мәктәбе укучылары ясаган эшләр шагыйрьнең әсәрләрендәге персонажларны гәүләндереп эшләнгән иде. Алар арасында Су анасы, Кәҗә белән Гали, Шүрәле, шәкерт һ.б. да бар.