Татарстан халкы 5G кулланырга әзер түгел

Татарстан халкы әлегә 5G челтәрен кулланырга әзер түгел дип саный экспертлар.

- Барыннан да элек, шуны әйтергә кирәк,хәзерге вакытта республикада 5G челтәре юк.  Татарстан 5G челтәрен гамәлгә кертүгә техник яктан әзер, әмма менә халык бу ресурслардан файдаланырга әзер түгел. Аларның әлегә яңа буын челтәрен бәяләү мөмкинлеге юк: 5G сигналын кабул итү мөмкинлеге булган техник чаралар базарга күпләп килми. 5G челтәренең ешлык диапазоны 4G челтәрендәге кебек үк: ул кешеләрнең сәламәтлегенә йогынты ясамый, - дип сөйләде МТС компаниясе эксперты, техник директоры Виталий Кошелев.

5G челтәрен тестлау буенча беренче тәҗрибәләр Казанда һәм Иннополиста 2018 елда ук үткәрелде.

Бүгенге көндә 5G челтәрләрнең коммерция ягыннан таралуы турында сөйләргә иртә, чөнки кулланучылар базары 5G челтәрен массакүләм кабул итәргә әзер түгел әле.

Татарстан территориясендә 5G челтәрен киң колачлау якындагы ике-өч елда планлаштырылмый. Хәзерге вакытта барлык эшләр дә планлаштыру һәм тестлаштыру стадиясендә.