Стажны раслаучы төп документ – хезмәт кенәгәсе

Пенсиягә чыкканда иминият стажы иминиятләнгән затның шәхси счетындагы мәгълүматлар һәм (яисә) хезмәт кенәгәсе һәм башка документлар нигезендә исәпләнә. Гражданнар мөрәҗәгать иткәч, Пенсия фонды белгечләре беренче чиратта тапшырылган документларның дөрес тутырылуын тикшерәләр һәм аларга хокукый бәя бирәләр. Стажны раслаучы документлар һәрвакытта да нормаларга туры килми, бу исә гражданнарның пенсиягә хокукларын тулы күләмдә исәпкә алырга мөмкинлек бирми. Төгәл булмаган язу эш вакытының теләсә кайсы чорында була ала. Пенсия яше җитүгә исә оешманың инде булмавы бар, документлар да архивка тапшырылмаска мөмкин.

Хезмәт кенәгәсендә фамилия, исем, әтисенең исеме паспорттагылар белән тулысынча туры килергә тиеш. Төзәтү булса, бу хакта кадрлар хезмәте белгеченең язуы булуы шарт. Фамилия үзгәрсә, нинди документ нигезендә үзгәртелүен күрсәтеп язарга кирәк. Эш турындагы барлык язуларда да нинди документка нигезләнгән булулары (эшкә кабул итү яисә эштән азат итү турындагы боерыкның саны һәм датасы) күрсәтелүе мөһим.

Хезмәт кенәгәсендәге язуларны карап, төгәлсезлекләр булса, үзең эшләгән оешманың кадрлар бүлеге белгеченә мөрәҗәгать итәргә кирәк. Хезмәт кенәгәсендә күрсәтелмәгән стажны раслау өчен өстәмә документларны алдан әзерләү шарт.

"Электрон формада пенсия билгеләү буенча әзерлек эшләрен оештыру турында"гы ТР Министрлар Кабинеты карары (№330, 20 май, 2013 ел) нигезендә кадрлар хезмәтенең җаваплы белгечләре, пенсиягә китүче хезмәткәрләргә документларның электрон үрнәкләрен алдан әзерләп, Пенсия фондына тапшырырга бурычлы.

Фото – "Мөслим-информ" архивыннан.