Социаль контракт төзүчеләр саны арта

– “Татарстан Республи­касында социаль контракт нигезендә дәүләт социаль ярдәмен күрсәтү турында”гы карар нигезендә җирлегебездә гражданнарның авыр тор­мыш хәлен җиңеләйтү бу­енча социаль адаптацияләү программасы тормышка ашырыла. Ләкин программа­га һәркем дә кертелә итә ал­мый. Социаль контракт фор­масындагы социаль ярдәм аз керемле гаиләләргә, ялгыз яшәүче аз керемле граждан­нарга адресланган, – ди ТР хезмәт, мәшгульлек һәм соци­аль яклау министрлыгының Мөслим районындагы бүлеге җитәкчесе Гөлнар Фәтхуллина.

Әлеге средстволар керемнәре республикабыз­да билгеләнгән яшәү мини­мумы күләменнән түбән бул­ган гаиләләргә һәм гаиләнең мөлкәт белән тәэмин ителе­ше түбән гаиләләргә посо­бие рәвешендә бирелә. Мисал өчен, аз керемле гражданин – эшсез, ди. Ул, эш урыны та­бып, бу хакта социаль яклау бүлегенә хәбәр итсә, эшкә ур­нашу турында җитәкчесенең боерыгын китергән очракта, аңа, хезмәт хакыннан тыш, дүрт ай дәвамында социаль яклау бүлеге аша да ай саен 11724 сум акча түләнәчәк. Шуны да белеп тору кирәк – социаль контракт төзегәннән соң, бер ай дәвамында граж­данин мәшгульлек үзәгендә исәпкә басарга тиеш. Алга таба рәсми рәвештә эшкә ур­нашырга кирәк булачак.

Үз эшеңне үстерү юнәлешендә дә социаль яклау бүлеге белән контракт төзергә була.

– Социаль контракт иң күбе 12 айга төзелә. Кон­тракт төзегән вакытка га­риза бирүченең үзмәшгуль яки шәхси эшмәкәр буларак теркәлмәгән булуы шарт. Га­риза бирүченең кереме Та­тарстанда билгеләнгән яшәү минимумыннан түбән бу­лырга тиеш. Быел соци­аль контракт кысаларында шәхси эшмәкәрлекне үстерү яки үзмәшгульлек өчен гражданнарның 150 мең сум­га кадәр дәүләт ярдәмен алу мөмкинлеге бар, – ди Гөлнар Фәтхуллина.

Үз эшен башлаучы соци­аль яклау бүлегенә бизнес- план проектын тәкъдим итәргә, нинди төр эшчәнлек алып баруы белән таныш­тырырга тиеш. Комиссия эш башлаучының бизнесын нәтиҗәлелеккә тикшерә, чы­гымнарны дәлилләүче че­кларны карый, гражданинның матди хәлен бәяли. Шун­нан чыгып, эш башлаучыга дәүләттән 150 мең сумга кадәр матди ярдәм күчерелә.

Социаль контрактны шәхси ярдәмче хуҗалыкны үстерүгә дә юнәлтергә була. Бу төр контракт буенча ярдәм күләме 75 000 сумнан ар­тмый. Гөлнар Фәтхуллина хәбәр итүенчә, авыр тормыш хәленнән чыгу өчен узган ел 102 кеше килешү төзегән. Быел ТР матди ярдәм күрсәтү үзәгенең 30нчы санлы фи­лиалына шундый ук гозер белән 29 кеше мөрәҗәгать иткән. Шуларның 19ына ко­миссия уңай карар чыгарган, берничәсенең эш планнары тикшерү стадиясендә.

– Баштагы чорда халык бу төр программаларның уңай якларын аңлап бетермәде ке­бек. Бүген социаль контракт төзүчеләр саны арта бара. Ярдәм алу өчен күпчелек күпбалалы гаиләләр, эшкә урнашырга теләүчеләр мөрәҗәгать итә. Программа ярдәмендә үз эшен башлау­чылар да шактый булды, – ди Гөлнар Фәтхуллина.

Социаль контракт нигезендә дәүләт социаль ярдәмен алырга теләсәгез, яшәү урыны буенча социаль яклау бүлегенә мөрәҗәгать итәргә була.

Лилия Шәймиева.

Фото – Pixabay.com