Саранлык турында

Халыкта берәр саран кеше турында сүз чыкса, «Ул бит карун, аннан кыш көне бер уч кар да алып булмый» диләр. Бу сүз безнең телгә каян килеп кергән соң? Сүзнең асылына төшенү өчен, Коръәнгә мөрәҗәгать итеп карыйк. «Хактыр ки. Карун Муса каве­меннән иде. Ләкин ул тәкәбберләнде. Без аңа шундый байлык бирдек, хәтта хәзинә амбарларының ачкычларын баһадирлар да көчкә күтәреп йөрер иде. Кавеме Карунга әйтте: “Байлыгын белән масайма, Аллаһы мактан­чыкларны сөймәс» - диде.

Чынлыкта, Карун мифик шәхес түгел, ул пәйгамбәр Мусаның (с.г.) кардәше бул­ган. Әмма Карун үзенең байлыгы белән тә­кәбберләнеп, үзенең кардәше Мусадан (г.с.) көнләшә һәм аның дәрәжәсен үзенә алырга тели. Аллаһы Тәгалә Карунны кисәтеп әйтә: «Аллаһының сиңа биргән мөлкәтеннән зәкят, садака биреп, Ахирәт көненә әзерлән. Дөньядагы өлешеңне дә онытма. Аллаһы си­ңа байлык биргән кебек, син дә кешеләргә юмарт бул».

Карун Аллаһының бу үгет-нәсыйхәтенә каршы: «Бу байлык миңа бары тик гыйле­мем аркасында гына килде...» - ди .

Әйе, Карунның зиннәтләрен, мал-мөлкәте сакланган амбарларының ачкычларын гына да уннан артык баһадир күгәреп йөр­гәч, аның байлыгы исәпсез-хисапсыз булган, әлбәттә. Ләкин ул үзенең кардәшләренә аз гына да өлеш чыгармый. Бу бән­дәнең саранлыгы чиктән ашкан була. Менә ни өчен безнең искитмәле гыйлем ияләре булган әби-бабаларыбыз саран кешене аның исеме белән карун дип атаганнар.

Раббыбыз үзенең бер аятендә саран­нарны гаепли, аларны кисәтә. Рәсүлебез (с.г.) исә юмартлык бе­лән саранлык хакында  менә ниләр әйтә. «Җәннәт - юмартлар урыны, сараннарныкы түгел. Юмартлык - тамыры җәннәттә булган агачтыр. Кем юмартлыкның тармагына ябышса, тармак аны тамырга, ягъни җәннәт­кә китерер. Саранлык - тамыры җәһәннәмдә булган агачтыр. Кем аның тармагына ябыш­са, тармак аны тамырга, ягъни җәһәннәм­гә китерер. Юмарт Аллаһка якындыр, саран исә аннан ерактыр».

Фото - ru.freepik.com