Рус Шуган авылында Май чабу бәйрәме

Әлеге йола җиде көн буена бәйрәм ителә. Май чабу атнасының һәр көне исемләп бүленгән. Май чабу атнасында православие халкы уйнап-көлеп кышны куа, табигатьне уята. Йола буенча, май чабу атнасында кунактан-кунакка йөрү гадәте каралган. Май чабуның төп атрибуты - түгәрәк коймак. Йола буенча, кояш символы атна буена һәр гаиләдә әзерләнә. Рус Шуганда узган бәйрәмдә дә әлеге атрибутларга өстенлек бирелгән иде. Авыл мәдәният йорты каршындагы мәйданда өстәлләрдә түгәрәк коймаклар, кайнар чәй, төрле чәй тәмнәре әзерләнгән. Бәйрәмгә килгән халык бу сыйлардан авыз итте. Бәйрәм чарасы театральләштерелгән тамаша белән башланып китте. Бәйрәм уңаеннан муниципаль район башлыгы урынбасары Азат Әхмәтҗанов, ТР Халыклар ассамблеясенең Мөслимдәге вәкиллеге җитәкчесе Рушат Солтанов, “ТР милли-мәдәни берләшмәсе” региональ иҗтимагый оешмасының Мөслим җирле бүлеге җитәкчесе Галина Светлякова, Рус Шуган авыл җирлеге башлыгы Альбина Басорина тәбрикләү сүзләрен җиткерделәр. Михайловка авылының “Рябинушка” фольклор ансамбле чыгышы да бәйрәмнең бизәге булды. Ә балалар бу көнне бизәлгән атларга утырып урам әйләнделәр. Рус шуган авылында узган бәйрәм, чыннан да күңелләрдә шатлык-бердәмлек хисе тудырды, күңелләргә бәйрәм рухы өстәде.