Мөслимнең авыл китапханәләре тәрбияви чаралар үткәрә

Авыл мәдәният йортларында, китапханәләрдә тәрбияви чараларга өстенлек бирәләр. Үрәзмәт авылы китапханәчесе мәктәп һәм "Сәйлән" балалар бакчасы белән берлектә "Көзге бал" үткәргән. Баек авылы китапханәсендә мәктәп укучылары белән берлектә әдәби кичә уздырганнар. Кичә драматург Юныс Сафиуллинга 70 яшь тулу уңаеннан оештырылган. Баланлы авылы китапханәчесе "Йортларга - китап нуры" акциясе кысаларында өлкәннәрне яңа газета-журналлар белән таныштырган. Краснояр авылы клубында "Тәмәкенең организмга зарары" дигән тәрбияви чара үткән. Югары Табын авылы китапханәсендә исә "Тәрбияле бала" түгәрәгенең чираттагы утырышы узган. Экология һәм табигый киңлекләр елына багышланган чараны саф һавада үткәргәннәр. Сабыйлар табигатьтә көз билгеләрен күзәтеп, бакчада үскән җимешләр, яшелчәләр, аларның файдасы турында сөйләшкәннәр.