Мөслим йолдызчыклары балкыды

Узган җомгада “Кояшлы Ык” ял зонасы кече амфитеатрында “Мөслим йолдызчыклары” фести­вале узды. Чарада ел дәвамында мәгариф, спорт, мәдәният өлкәләрендә активлык күрсәткән, укуда уңышларга ирешкән балалар һәм аларның остазлары данланды. Алдынгыларны район башлыгы Ра­мил Муллин тәбрик итеп, рәхмәт хатлары белән кыйммәтле пакет­лар тапшырды.

– Мөслим – уникаль шәхесләргә, талантлы балаларга бай җирлек. Укучыларыбызның уңышлары, ба­лаларыбыз яулаган үрләр – уртак җиңүебез. Балалар уңышы нигезендә мөгаллимнәребезнең өлеше әйтеп бе­тергесез зур. Укучыларга, аларның остазларына рәхмәт! Алга таба да юга­ры үрләр яулавыгызны телим. Мөслим данын күтәрүдә бергәләп эш алып бар­ганда гына җиңүләребез дәвамлы була­чак, – диде Рамил Муллин.

Быелгы фестиваль башка еллар белән чагыштырганда үзгә булды. “Мөслим йолдызчыклары” фестива­ле кысаларында отличниклар парады (172 кыз һәм егет) узды. Мөслим эмбле­масы төшерелгән ак футболкалар һәм бейсболкалар кигән укучылар танта­налы музыка астында тамашачыларны сәламләде. Алар артыннан мәйданга балалар бакчаларының чыгарылыш төркеме балалары чыкты. Быел алар бе­ренче сыйныфка барачак.

– Фестивальгә дүрт юнәлештә бүләкләнүчеләр чакырылды. Алар – сәнгать, мәгариф, спорт өлкәләрендә уңышка ирешкән балалар һәм актив гаиләләр. Олимпиадаларда җиңү яу­лаган 29 укучы һәм аларны бәйгегә әзерләгән 20 укытучы хөрмәтләнде бүген. Җиңүчеләребезнең саны елдан- ел арта. Укучыларны тантаналы шарт­ларда бүләкләү яхшы укырга – сти­мул, җиңүләргә этәргеч булып тора. Мөслимебезнең кечкенә йолдызчыкла­ры да сынатмаслар, дип ышанам,– ди район мәгариф идарәсе җитәкчесенең тәрбия эшләре буенча урынбасары Ле­низа Галимова.

Фестивальдә “Иң тату сыйныф” конкурсында җиңү яулаган Мөслим гимназиясенең 8б сыйныфы (сыйныф җитәкчесе – Гөлшат Мөхәмәтҗанова), лицейның төрле чараларда актив­лык күрсәткән 7б сыйныфы (сый­ныф җитәкчесе – Эльвира Ситдый­кова) да хөрмәтләнде. “Музыкаль гаилә” номинациясендә Мөслимнән Шәриповлар гаиләсе бүләкләнде.

“Мөслим йолдызы” статуэткалары­на гимназиянең 8б һәм 10 сыйныф уку­чылары Зөлфия Гыйльфанова, Ильвина Хафизова, Диләрә Зыязова, Мөслим урта мәктәбенең 10 сыйныф укучысы Диана Шиһапова, район мәдәният йорты кар­шында эшләүче “Мизгел” бию төркеме лаек булды. Мөслим гимназиясенең 10 сыйныф укучысы Зөлфия Гыйльфано­ва “Ел укучысы” исемен алды. Аның фотосурәте “Дан тактасы”нда урын ала­чак.

Җыр - биюләр бәйрәмне җанландырды. Бәйрәмгә җыелган та­машачылар – әти-әниләр, әби-бабайлар, гомумән, Мөслимнең олысы-кечесе бу көнне рәхәтләнеп ял итте.

– Оныкларым уңышлары белән гел сөендереп киләләр. Оныклар ирешкән биеклекләр әби-бабай өчен бигрәк зур сөенеч икән ул. Җирлегебездә талант­лы балаларның күп булуына сөенеп, со­кланып утырдым. Мөслимнең киләчәге алар! – ди мәгариф ветераны Маргари­та Идиятуллина.

Фестивальдә “Мөслим егете. Мөслим кызы” муниципаль проектына да старт бирелде. Мөслим гимназиясеннән Айназ Галимова һәм Мари Бүләр мәктәбеннән Кирилл Кирилловка проектның символы булган түбәтәйләр бүләк иттеләр. Быел әлеге бәйгедә баш­лангыч сыйныф укучылары көч сынаш­са, алдагы уку елында конкурс урта һәм югары класс укучылары арасын­да үтәчәк.

Лилия Шәймиева.

Автор фотосы.