Халык киләчәге өчен борчыла

Мөҗәһидан Морта­зин Тат. Бүләр мәчетенең арткы өлешенә койма тоту мәсьәләсен күтәрде. Мөҗәһидан абыйның сүзләрен хуплап, авыл мулласы Илгиз хәзрәт берочтан мәчет мана­расын буяу кирәклеген, Аллаһ йортының җылыту система­сы булмавын да билгеләп үтте. Җыенга шушы авылда туып-үсеп, бүген читтә гомер итүчеләр дә кайткан иде.

– Үз-үзен хөрмәт иткән кешенең тарихи үткәне, гореф-гадәтләре сакланырга тиеш. Авылыбызның үз музее булырга тиеш! Ул балалары­быз һәм оныкларыбыз өчен тиңсез ядкарь булыр иде. Му­зей булдыру өчен үткәнебез дә, истәлекләребез дә җитәрлек, – диде Азнакайдан Яңа Сәеткә кунакка кайткан Гөлчәчәк Җәлилова.

– Яңа Сәет клубын җимереп аттылар. Югыйсә, бу бинаның түбәсен алышты­расы һәм күпмедер ремонт кирәк иде. Алты ел эшләмәгән клубтан җайлы гына ко­тылдылар. Тик бу эш ахы­рына кадәр җиткерелмәде. Бинаның бер як дивары ба­сып калды. Бу, үз чиратында, бала-чага өчен зур куркыныч тудыра. Стена ишелеп төшсә, астында калып, харап булача­клар бит! Авылдагы иске агач мәктәп тә ташландык хәлдә. Читтә яшәүче бер авылда­шыбызга аны ремонтларга тәкъдим иткәннәр иде. Бина ремонтланса, мәдәни чара­ларны шунда үткәрү мөмкин булыр иде. Җыелышларны да шунда үткәрер идек, авыл халкының рәхәтләнеп сөйләшер урыны булыр иде. Бу эшләрне без генә башка­рып чыга алмыйбыз, район җитәкчелегеннән ярдәм со­рыйбыз, – диде Эльвира Мир­салихова.

Җыен кызганнан-кыза барды. Җирлек халкы зират­ларны чиста тоту мәсьәләсен дә кабыргасы белән куйды. (Җирлектә җиде авылда сигез зират бар!). Кыш көне керү юл­ларын ачуны оештыру зарур­лыгы да әйтелде. Иске Сәет авылының Зеленая урамына гравий җәю мөһимлеген дә әйтте халык. Исәнсеф авыл җирлеге башлыгы үзара са­лым акчасын һәр авылның үзенә кулланачакбыз дип бел­дерде. Мари Бүләр һәм Яңа Сәет авылларының су систе­масына ремонтны да үзара са­лым хисабына башкару план­лаштырыла. Тат. Бүләрнең Набережная, Мирная, Колхоз урамнарына гравий түшәү дә эш планына кертелгән. Яңа Сәет, Чишмә һәм Исәнсеф авылларындагы ташландык ихаталарга койма тоту, Яңа Сәет авылындагы һәйкәлгә капиталь ремонт үткәрү дә күз уңында тотыла.

Үрәзмәт авыл җирлегендә җыен, гадәттәгечә, тыныч узды. Җирлек халкы бер генә мәсьәлә дә күтәрмәде. Бүләк авылы халкы, гравий һәм таш салып, юл күтәртергә исәпли. Ник дигәндә, кышкы буран­нар юлда тоткарлыклар туды­ра. Шуның өчен 250 метр ара­да юл салу кирәк. Чишмә авы­лына да юл юк, тик аны үзара салым акчасына гына башка­рып чыгып булмый.

– Көнкүреш өчен бөтен мөмкинлекләр дә бар. Бала­лар саны аз булуга карама­стан, мәктәп укучылары да, бакчага йөрүче нәниләр дә республикакүләм бәйгеләрдә җиңүләр яулый. Үрәзмәт баш­лангыч мәктәбендә алты бала белем ала, балалар бакчасына өч сабый йөри, – ди Гүзәлия Шәйгарданова.

Лилия Шәймиева.

Автор фотосы.