Камиллеккә омтылып эшлибез

Кеше күңеленә матурлык, илаһилык орлыклары, моң үрнәкләре салып, халкыбызның киләчәккә булган ышанычын, рухи байлыгын артты­ру – сәнгать дөньясы алдында торган җаваплы бурычларның берсе. Үз агы­мына гына барган тормышны бизәү, халыкның милли аңын уяту мәдәният хезмәткәрләреннән иҗади үҗәтлелек, тырышлык, тынгысызлык, әдәби көч- куәтнең ташып торуын таләп итә. Мәдәният өлкәсендә башкача эшләү мөмкин дә түгел.

2021 ел республикада Туган телләр һәм халыклар бердәмлеге елы дип игъ­лан ителү традицион халык иҗатын сәхнәгә кайтарырга, милли моң, оны­тыла башлаган халык уен коралларына, халык фольклор ансамбльләренә игъ­тибар итүгә зур этәргеч булды. Шулай ук узып баручы ел җирлегебез, район мәдәният хезмәткәрләре өчен сынау елы булып та тарихка кереп калыр: Мөслим Бөтенроссия авыл сабан туен уздырып, 35 меңнән артык кунак кабул итте!

Һәр эшнең нәтиҗәсе яуланган үрләр белән бәяләнә. Мөслим мәдәният бүлегенең дә 2021 елда ирешкәннәре бихисап.

– Эшчәнлегебездә грантлар систе­масын актив кулланабыз. Ел дәвамында бүлек белгечләре федераль һәм республикакүләм конкурсларда проект­ларын яклап, аларны тормышка ашыры­рыга 4 миллион сумнан артык финанс ярдәме үзләштерде. Грантлар җирлектә халык уен коралларында уйнау буенча фестиваль-конкурс уздыру, Михайлов­ка авылында виртуаль концерт залы бул­дыру, яшь каләм тибрәтүчеләрнең “Та­лантлы син, туган җирем” шигырь фе­стивален үткәрүгә юнәлтеләчәк, – ди район мәдәният бүлеге җитәкчесе Ирек Салихҗанов.

Һәр буынга тәрбияви орлыкларын сипкән, тарихи мизгелләрне чагылдыр­ган гореф-гадәтләр, йола-уеннар, такма­клар, мөнәҗәтләрне бездән соңгы буын­нарга җиткерүдә җирлегебездә эшләүче халык фольклор ансамбльләренең роле зур. “Мөслим тугайлары” халык фоль­клор ансамбле (җитәкчесе – ТР атка­занган мәдәният хезмәткәре Фәнис Аб­дуллин) Россиянең “Мәдәният” милли проекты кысаларында һәвәскәр иҗат коллективлары арасында уздырылучы конкурста гран-прига лаек булып, 2 мил­лион сум күләмендә грант отты.

– Ансамбльгә яңа костюм комплек­ты тектерелде, уен кораллары базасы яңартылды. Минзәлә, Сарман районна­рында, Казанда дәүләт филармониясе сәхнәсендә тамашачыларга концерт һәм мастер-класслар уздырылды. Ансамбль 13 декабрь көнне Мәскәүдә Рус җыры те­атры сәхнәсендә Татарстанны тәкъдим итеп чыгыш ясады, – ди мәдәният бүлеге җитәкчесе Ирек Салихҗанов.

“Ык буйлары” халык җыр һәм бию ансамбленең дә (җитәкчесе – ТР ат­казанган мәдәният хезмәткәре Ирек Салихҗанов) уңышлары сөендерә. Мөслимнең визит карточкасы булган әлеге ансамбль күптән түгел Казанда узган “Әпипә” бөтенроссия бию кон­курсында катнашып, илебезнең 20дән артык төбәгеннән җыелган коллектив­лар арасында өченче урынны яулады. 20дән артык җырчы-биючесе булган ан­самбль – һәр бәйрәмнең, һәр чараның бизәге.

Кеше гомер-гомергә рухи яктан үсәргә, мәдәниятле булырга омтыл­ган. Бу халәт мөслимлеләргә дә хас. Зифа Басыйрова исемендәге район мәдәният йорты каршындагы “Миз­гел”, “Хәзинә”, “Мөслим йолдызчыкла­ры” бию төркемнәрендә 300гә якын бала шөгыльләнә. Сәләтле балалар рай­он күләмендә узучы чараларны чыгыш­лары белән бизәп кенә калмый, бәйге- фестивальләрдә дә осталыклары белән сөендерә. Узган атнада гына “Мизгел” бию ансамбле (җитәкчесе – Ксения Нәбиева) башкалабызда беренче тап­кыр узган “Чулпан” халык бию сәнгате фестивалендә икенче дәрәҗә лауреат исемен алды. Бу ансамбльнең күпсанлы җиңүләреннән берсе генә!

Мөслим халык театры да уңышлы эшли. Күп еллар инде коллектив үз та­машачысын тирән мәгънәле, әхлакый әсәрләр белән сөендерә.

– Быел сәхнәләштерелгән Аяз Гыйләҗевның “Өч аршын җир” траге­диясен тетрәнми карау мөмкин түгел иде. Спектакль “Идел-йорт” төбәкара те­атр коллективлары фестивалендә икен­че урынны яулады. Мөслим халык теа­тры диплом һәм 75 мең сум күләмендә акчалата премия белән бүләкләнде, – ди Ирек Салихҗанов.

Милләтебезне саклап калу, те­лебезне, динебезне яклау, мил­ли мәдәниятебезне үстерү, гореф- гадәтләребезне яңарту, хезмәт кешесенең ялын күңелле һәм фай­далы итеп уздыру – мәдәният хезмәткәрләренең төп бурычы. Алар шул максаттан чыгып иҗат итә, камиллеккә омтылып эшли.

Мөнирә Арсланова.

ФОТО – МӘДӘНИЯТ БҮЛЕГЕ АРХИВЫННАН.