Илсаф – җиңүче!

“Яшь профессионаллар” (WorldSkills Russia) VIII ачык төбәк чемпионатында Мөслим политехника тех­никумы беренче мәртәбә генә катнашмый. Чемпио­натта катнашучылар бил­геле бер компетенциядә белемнәрен һәм осталыкла­рын күрсәттеләр. Районда­шыбыз Илсаф Минһаҗев чемпионатка остазы – техникумның производство мастеры Евгений Басорин белән барды. Алар “Эре­теп ябыштыру технология­се” компетенциясендә ком­плекслы эш күрсәттеләр.

– Татарстанда “Яшь про­фессионаллар” һөнәри оста­лык чемпионатының төбәк этабында катнашу – безнең өчен үзе бер җиңү. Илсаф иң элек сайлап алу чемпиона­тында катнашты. Ярышлар республиканың ике дистәгә якын шәһәр һәм районын­да төрле компетенцияләр буенча җиһазландырылган мәйданчыкларда узды, – ди Евгений Басорин. – Регио­наль этап нәтиҗәләре буен­ча “Яшь профессионаллар” милли чемпионатында кат­нашу өчен Татарстан җыелма командасының киңәйтелгән составы билгеләнә. Илсаф әлеге составка керсә, бездән тагын да ныклы әзерлек таләп ителә.

– Эретеп ябыштыручы һөнәре зур осталык, төгәллек һәм игътибар таләп итә. Бу һөнәрнең нечкәлекләренә төшенсәң, кечкенә тимер кисәгеннән әллә нинди матур әйберләр ясарга була! Евгений Петрович төркемендә без 11 кеше шөгыльләнәбез. Дәрестә өйрәнгәннәрне гамәлдә ны­гытабыз. Күпләребез җәйге практиканы җирлегебездәге оешма-предприятиеләрдә үтә. Эшебезгә югары бәя бирәләр икән, бу – остазыбызның тырыш хезмәте нәтиҗәсе. Киләчәктә тормышым­ны сайлаган һөнәрем белән бәйләргә уйлыйм, – ди Илсаф Минһаҗев.

– Республиканың һөнәри компетенцияләрне үстерү үзәге белгечләре хәбәр итүенчә, быел компетенцияләр исемлеге киңәйтелгән. Яңалар арасын­да “Оча торган робототехни­ка”, “Сити-фермерлык”, “Сак­чыл җитештерү”, “Банк эше”, “Модалы кием һәм аксессуар­лар дизайны” бар. Алдагы ел­ларда бу төр компетенцияләр буенча катнашырга теләк белдерүчеләр дә булыр, дип ышанам, – ди техникум дирек­торы Илнар Миргалимов.

Узган ел техникумның III курс студенты Ләйлә Нәсифуллина челтәр чем­пионатында өченче урынга лаек булып, региональ тур­да беренче бишлеккә кергән иде. Ләйләнең бәйгедә, “Осе­тия пирогларын пешерү” компетенциясендә көч сы­нашып, 15 төрле пирог пешерүе турында хәбәр иткән идек. Быел “Пешекче эше” компетенциясендә Аза­лия Гыйльметдинова катнаш­ты. Аның мастеры – Рүзилә Бәдретдинова.

– Беренче өчлеккә керә алмасак та, челтәр чемпи­онатында уңышлы чыгыш ясадык. Азалия үрдәк ите белән икенче аш әзерләде. Азалиянең аш-пюресы да телеңне йотмалы иде. Пешек­че һөнәрен хәзер кызларны­кы дип булмый, егетләр дә аш- суга осталыкларын күрсәтә, – ди техникум мастеры Рүзилә Бәдретдинова.

Эшче һөнәрләр буенча әзерлек сыйфатын күтәрүгә һәм яшьләр арасында әлеге белгечлекләрне популяр­лаштыруга юнәлтелгән “Яшь профессионаллар” бәйгесе егет-кызларның осталыгын ачыкларга мөмкинлек бирә. Ярышларда һөнәри осталы­кларын күрсәтүче яшьләр киләчәктә дә сайлаган юлла­рыннан тайпылмасыннар иде.

Лилия Шәймиева.

Фото– Е. Басоринның шәхси архивынан.