Гөлнар Фәтхуллина: “Һөнәр түгел, ә күңел халәте!”

Социаль яклау бүлеге аз керемле, күпбалалы гаиләләргә, инвалидларга, төрле сәбәпләр белән авыр хәлдә калганнарга ярдәм итә. Районның дүрт социаль хезмәт күрсәтү учреждение­се ай саен 8000 кешегә якын социаль хезмәт күрсәтә. Мон­нан тыш төрле төрдәге 100гә якын социаль хезмәт оешты­рылган.

– “Өлкән буын” милли проекты кысаларында план­лы рәвештә 65 яшьтән уз­ган өлкәннәргә диспансери­зация уздырыла. Быел 2408 кешегә медицина күзәтүе үткәрү планлаштырыла. Өлкәннәрне карарга өйрәтү мәктәбе эшли башлады. Бала тәрбияләүче гаиләләргә дә со­циаль ярдәмнең яңа төрләре өстәлде. 18 яшьтән 45 яшькә кадәр мөмкинлекләре чи­кле гражданнарның буш вакытын оештыру макса­ты белән аерым социаль хезмәт күрсәтелә башлады. Яңа төр хезмәткә мохтаҗ гаиләләр аз түгел. Башка­лар хәсрәтен үз йөрәкләре аша үткәрә белүчеләр генә социаль хезмәткәр булып эшли ала, – ди социаль яклау бүлеге җитәкчесе Гөлнар Фәтхуллина.

Картлар һәм инвалидлар йортында яшәүчеләр өчен социаль хезмәткәр туганы, баласы кебек якын. Картлар йортында эшләүчеләр әби- бабайларны бала урынына карый, аларның серләрен дә сыйдыра, юата-тынычлан­дыра да. Район картлар һәм инвалидлар йортында бүген 22 хатын-кыз һәм 28 ир-ат яши. Тәрбияләнүчеләрнең барысы да – сәламәтлек мөмкинлекләре чикле өлкәннәр.

– Ялгыз картлык бик авыр. Хезмәткәрләребез өлкәннәрнең хәлен аз гына булса да җиңеләйтә ала икән, хезмәтебез бушка китми, дигән сүз, – ди картлар һәм инвалидлар йорты җитәкчесе Гөлнар Шакирянова.

8 июнь – социаль учреждениеләрдә даи­ми нигездә эшләүчеләрнең генә түгел, волонтерларның, сиделкаларның , социологларның да һөнәри бәйрәме. Коронавируска бәйле вәзгыятьтә соци­аль хезмәткәрләр, медици­на хезмәткәрләре кебек үк, инвалидлар, кайгыртучы­сыз калган өлкәннәр өчен төп ярдәмче булды. Алар эшләрен бер көнгә дә туктат­мады, изоляция вакытын­да мохтаҗларга азык-төлек һәм дарулар китерделәр, хөкүмәттән килгән ярдәм – азык-төлек җыелмаларын ияләренә тапшырыр­га булыштылар. Шунысы сөенечле, районда соци­аль ярдәм күрсәтүдә яңа төр хезмәтләр дә барлыкка килә. Дөрес, район халкының тормыш-көнкүреше, яшәү шартлары яхшырган саен со­циаль өлкә белгечләренә дә таләпләр арта, халык аларга күбрәк мөрәҗәгать итә. Ә ха­лык ышанычы ул – хезмәтеңә иң зур бәя!