Гади һәм җайлы

Телефоныгыздагы Россия Пенсия фондының мобиль кушымтасында сез үзегезнең эш стажыгыз һәм эшләгән һәр ел өчен исәпләнгән пенсия баллары саны турында белә алачаксыз, дип хәбәр итәләр Мөслим районында клиентлар белән эшләү хезмәтеннән. Эш бирүчегезне контрольдә тотачаксыз. Эш бирүче сезгә иминият взносларын күчерәме һәм күпме күләмдә күчерә – сез бу хакта белеп торачаксыз.

Пенсия тупланмалары турындагы мәгълүмат: аларның гомуми күләме, инвестицияләрне исәпкә алган күләм –   һәрвакыт кул астыгызда булачак. Мобиль кушымта ярдәмендә пенсия бүлегенә чиратка язылырга, мөрәҗәгать җибәрергә, кирәкле документларны соратырга мөмкин, – ди Мөслим районында клиентлар белән эшләү хезмәте җитәкчесе Фәридә Ганиева.

Пенсия калькуляторын файдаланып, үзеңнең булачак пенсияңне, шулай ук пенсия балларын исәпләргә мөмкин. Пенсионерлар пенсияләрен индексацияләү турындагы мәгълүматны белә ала. Әгәр сез эшләүче пенсионер икән, лаеклы ялга чыгу вакытын чикергәч, пенсиягезнең ничек артуын белә алачаксыз.

Әниләр өчен ана капиталы турындагы мәгълүмат бар, диләр пенсия бүлеге белгечләре. 

Мөнирә Арсланова.