Флюорография туберкулезны ачыкларга ярдәм итә

Район үзәк хастаханәсеннән алынган мәгълүматлар буенча бүгенге көндә туберкулез авыруы белән 17 кеше диспансер исәптә тора. Аларның 7се – актив учетта. Калган 10 кеше, туберкулездан терелсә дә, өч ел дәвамында табиблар күзәтүе астында була. Быел әлеге авыру белән бер кеше исәпкә алынган. Исәптә торучылар арасында балалар юк. 
Табиблар ике елга бер тапкыр флюорография тикшерүе узарга кирәклеген искәртә. Чөнки туберкулез, үпкә һәм тын юлларындагы яман чирләр күбрәк флюорография нәтиҗәләре буенча ачыклана. Узган ел Мөслим районы буенча 99,9% кеше флюорография узган. Аның нәтиҗәләре буенча 512 кеше өстәмә тикшерелүгә җибәрелгән һәм дүрт кешедә туберкулез авыруы булуы ачыкланган. Тикшерү нәтиҗәләре буенча 17 кешегә яман чир диагнозы куелган, 64 кешедә башка төр авырулар булуы ачыкланган. Быел барлыгы 10 мең 600 кешегә флюорография уздыру планлаштырыла.

Фото - Pixabay.com