Дельфиннан да җитезләр

2012 елгы һәм аннан кечерәк малайлар арасында Айзат Галимҗанов ирекле стиль белән 50 метрга йөзүдә – икенче, аркада 25 метрга йөзүдә өченче урынга лаек булды. Кызлар арасында Ләйлә Баһауова – ирекле стиль белән (50 м), Әминә Хафизова аркада (50 м) йөзүдә өченче урынны алдылар. 
100 метрлы дистанциядә узышкан 2008-2009 елгы үсмерләр дә сынатмады. Ирекле стиль белән йөзүдә Динар Шәфигуллин, Әмир Фатыйхов, Айзат Харисов призлы урыннарны бүлештеләр. 50 метрга брасс белән йөзүдә финишка Динар Шәфигуллин – икенче, Нурислам Мотыйгуллин өченче булып килде. 
Әмирә Шәйхразиева 11-12 яшьлекләр арасында 50 метрга брасс белән йөзүдә барыннан да җитез булды, Регина Ибраһимова өченче урынны алды. 100 метрга ирекле стильдә йөзүдә Әмирә – икенче, Зәринә Нуретдинова өченче урынны яулады. 2006-2007 елгы кызлар арасында Динә Әмирова барысын да уздырды. Ул ике төрле стильдә дистанцияне беренче килде. Аделина Шәймөхәммәтова – ирекле стильдә, Алсу Сабитова брасс белән йөзүдә өченче урынны алды. 
Эстафета узышында безнекеләр аеруча матур нәтиҗәләр күрсәтте. Малайлар арасында 4х50 метрлы дистанциягә узышта “Мөслим-1” командасы беренче урынны яулады. “Мөслим-2” командасы йөзүчеләре икенче булды. Кызлар арасында да “Мөслим-1” командасына тиңнәр булмады. “Мөслим-2” кызлары почет пьедесталының өченче баскычына күтәрелде. Йөзүчеләрнең тренерлары – Алмаз Дәүләтшин, Фәрхәд Хәбибуллин, Алмас Латыйпов. 
Әльфинур Ногманова.

Фото – спорт мәктәбе архивыннан.