Балагыз юл кагыйдәләрен беләме?

20 май көнне Мөслим авы­лында – Гагарин һәм Беренче май урамнары киселешендә ба­лигъ булмаган бала катнашын­да юл-транспорт фаҗигасе теркәлә. Метрәй авылыннан 15 яшьлек егет мотоциклда маши­нага килеп бәрелә.

– 9 сыйныфта укучы яшүсмер төп юлдан хәрәкәт итүче машинага юл бирми һәм зур тизлектә “Рено Логан” машинасы белән бәрелешә. Яшүсмернең транспорт белән идарә итү хокукы юк. Ул төрле дәрәҗәдәге авыр тән җәрәхәтләре белән Яр Чаллы хастаханәсенә озатылды. Хәле авыр дип бәяләнә. Бүген ул Ка­зан хастаханәсендә, – ди юл хәрәкәте иминлеге комиссиясе рәисе Ирек Салихҗанов.

Комиссия утырышын­да мәктәпләр юлларда балаларның иминлеген тәэмин итү өлкәсендә башкарылган эшләре буенча хисап тотты. Рай­он эчке эшләр бүлеге җитәкчесе Рөстәм Мөхәммәтҗанов бала­лар арасында юл-транспорт фаҗигаләрендә имгәнүләрне кисәтү буенча эшчәнлеккә, мәктәп автобусларында имин­лек чараларының үтәлешенә тукталды.

– Күпчелек юл һәлакәтләре кагыйдәләргә буйсын­мау сәбәпле килеп чыга. Яшүсмерләр, балалар да кагыйдә боза. Велосипедта йөрү өчен документ кирәк бул­маса да, 14 яше тулмаган бала­ларга бу төр транспорт белән олы юлга чыгарга ярамый. Ве­лосипед белән ишегалдын­да, тротуарларда гына йөрү рөхсәт ителә. Кагыйдә бозган өчен баланың әти-әнисенә штраф салына һәм аның күләме 500 сумнан башлана, – ди районның ДАИ җитәкчесе Айнур Хәйретдинов.

Мотоциклда 18 яше тулган һәм шушы төр транспорт белән идарә итү хокукы булганнар гына йөри ала. 18 яше тулып та, мотоцикл белән идарә итү хоку­кы булмаган килеш әлеге транс­портны йөртүчеләргә 5 мең сум­нан 15 мең сумга кадәр штраф салына. 18 яше тулмыйча мо­тоциклга утырган балалар өчен штрафны әти-әни түли. Моннан тыш, транспортны балигъ бул­маган үсмергә биргән өчен та­гын 30 мең сум штраф карал­ган. Баланың транспорт белән идарә иткәндә каскасы булма­са – 1 мең сум, иминиятләштерү кәгазе булмаса, 800 сум штраф өстәлә. Кыскасы, баланың мо­тоциклда “права”сыз йөрүе әти- әни кесәсенә уртача 50 мең сум­га төшә!

– Скутер һәм мопедлар­да йөрү өчен “М” категория­ле машина йөртү хокукы булу кирәк. Очсыз дип, мотоцик­лны кеше кулыннан алучылар транспортның төзек булуына гарантия бирә алмый. Транс­порт белән идарә итүдән бигрәк, яшүсмерләр башта җәяү дөрес йөрергә өйрәнсен иде! – ди Ай­нур Хәйретдинов.

23 майдан 5 июньгә кадәр “Игътибар: балалар!” профи­лактик операциясе старт алды. Аның барышында юл йөрү кагыйдәләрен бозучы балалар катгый контрольгә алыначак.

– Акциянең төп максаты – балалар катнашындагы юл- транспорт фаҗигаләре санын киметү. Светофорның кызыл уты янганда юл аша чыгучы, ве­лосипедта тиешсез урыннарда йөрүче балалар аз түгел. Быел кагыйдә бозган шундый 14 уку­чыга махсус карточкалар туты­рылып, мәктәпләргә җибәрелде, – ди Айнур Хәйретдинов.

Әти-әниләргә балага бүләк ясаганда уйланырга киңәш итәбез. Балагызга алган мото­цикл, скутер яисә мопед аның тормышына куркыныч тудыр­масын. Башкалар ялгышыннан сабак алыгыз!

Лилия Шәймиева фотосы.