«Август-Мөслим» агрофирмасы үз хезмәткәрләре өчен зур бәйрәм оештырды

Авыл хуҗалыгы һәм эшкәртү сәнәгәте хезмәткәрләре көне һәм урып-җыю эшләренең төгәлләнүе уңаеннан "Август-Мөслим" агрофирмасы үз хезмәткәрләре өчен зур бәйрәм оештырды.

"Анда район башлыгы Альберт Хуҗин да катнашты. Ул компания белән горурлануын белдерде һәм бертөркем алдынгыларга Рәхмәт хатлары һәм Мактау грамоталары тапшырды.

"Август-Мөслим" агрофирмасы генераль директоры Юрий Янковский компаниядә эшләүчеләргә тырыш хезмәтләре өчен рәхмәт әйтеп, ихлас теләкләрен җиткерде. Бертөркем хезмәткәр компаниянең Рәхмәт хатлары белән бүләкләнде.

Чара музыкаль бүләкләр белән үрелеп барды", - диелә район хакимиятенең матбугат хезмәтеннән алынган хәбәрдә.

Фотолар - район хакимиятенең матбугат хезмәтеннән.