Апрельдә бакча эшләре

Кишер, петрушка, укроп, аш чөгендере, салат, шпинат, башлы суган орлыкларын чәчүгә әзерлиләр. Кар эреп бетү белән үк, туфрак әле бик дымлы чакта, бакчага азотлы ашламалар (мочевина, амми­ак селитрасы, тирес сыекча­сы) кертелә. Бу вакытта алар туфракта әйбәт эри, язгы су аларны аскы катламнарга агы­за алмый. Бу ысул бигрәк тә бакча җиләге өчен нәтиҗәле.

Бакча җиләгенең 10-15 көнгә иртәрәк өлгерүен те­лисез икән, иртә өлгерә тор­ган сортларның өстенә дуга рәвешендә каркас куеп, өстен пленка белән каплагыз. Узган ел гына утырткан җиләкләрне җентекләп карагыз, арала­рында туфрак өскә кысып чы­гарган үсентеләр булса, баты­рып куегыз.

Күпьеллык яшелчә культу­ралары (батун-суган, рәваҗ, кузгалак), шулай ук бакча җиләге кишәрлекләрендәге үсемлек калдыкларын тырма­лап алыгыз, чистартыгыз, ми­нераль ашламалар кертеп, рәт араларын йомшартыгыз.

Апрель урталарыннан соң, утыртырга өч атна чамасы кала, бәрәңгене баз яки под­валлардан чыгарып, борын­лар өчен ачык һавада яисә якты сарайларда таратып ку­ярга кирәк.

Туфракны эшкәртү белән үк кишер, петрушка, укроп, ре­дис, салат, шпинат, борчак, аш чөгендере, яшел кыяк өчен су­ган, башлы суган өчен орлы­клык суган, сарымсак, иртә өлгерешле ак башлы кәбестә утырта башлыйлар.

Билгеле, бу эшләрне башкарганчы, бакчаны җыештырып алырга кирәк. Үсемлек калдыкларын, чүп- чар, яфракларны зарарсыз­ландырып, компост ясау өчен файдаланалар, чүп үләннәрен, бигрәк тә койма, сарай буйла­рында үскән үләннәрне пре­паратлар белән эшкәртәләр. Җиләк-җимеш агачларының нигезләрен кабат агарталар. Агарту артык җылынудан са­клый, чәчәк атуны тизләтә һәм тышча астында кыш­лаган чәчәк ашаучыларны, бетләрне, гөмбәчекләрне, мүкне юкка чыгара.