Алда – ял һәм хезмәт чиреге

Мәктәпләрдә яңгыраган соңгы кыңгырау чыңы, уку елының төгәлләнүе турын­да гына хәбәр итеп кал­мыйча, балаларны ял һәм хезмәт чирегенә дә дәште кебек.

Күп гаиләләрдә балалар да, әти-әниләр дә өч айга сузылу­чы каникулларны ничек фай­далы һәм күңелле итеп үткәрү турында алдан ук планлаш­тырып куйды инде. Кемдер лагерьда ял итәргә җыена. Ку­накка баручылар да булыр, башка еллардагы кебек акча эшләп алу турында уйлаучы­лар да бар. Ләкин кайда ничек кенә узмасын, җәйге айларда да балаларның иминлеге һәм сәламәтлеге беренче урында торырга тиеш. Утырышта чы­гыш ясаучылар барыннан да бигрәк шул мәсьәләгә игъти­бар итте.

Районда мәктәп яшендәге 2085 бала исәпләнә бүген. Ба­лалар бакчасында 850 са­бый тәрбияләнә. Мәктәптән тыш эшләр үзәгеннән алын­ган мәгълүматларга кара­ганда, “Урман иле” ял һәм сәламәтләндерү лагеренда бу җәйдә өч сменада барлыгы 220 бала ял итәр дип көтелә. Икен­че, өченче сменаларга уңышсыз гаиләләрдә тәрбияләнүче 18 ба­ланы тарту күздә тотыла. Мон­нан тыш Михайловка, Мөслим, Күбәк урта мәктәпләре һәм гим­назия базасындамәктәп яны ла­герьлары да эшли. Аларда бар­лыгы 234 бала ял итәчәк.

– Билгеле, һәр баланы да лагерьларга урнаштырып бетерү мөмкин түгел. Шулай да социаль яктан уңышсыз гаиләләрдә тәрбияләнүче балаларның ялын оештыру турында да онытмаска кирәк. Аларга хезмәт тәрбиясе бирү дә игътибар үзәгендә булыр­га тиеш, – диде район Башкар­ма комитеты җитәкчесенең социаль-мәдәни мәсьәләләр буенча урынбасары Марина Бәдретдинова.

Җәй күпләр өчен хезмәт чиреге дә бит әле. Укучылар мәктәп яны тәҗрибә участо­кларында практика уза. 14 яше тулган балалар оешма- предприятиеләргә эшкә ур­наша. Хезмәт һәм мәшгульлек үзәге директоры Дамир Мөхәмәтдинов сүзләренә кара­ганда, район буенча 190 үсмерне эшкә урнаштырырга планлаш­тыралар. Моның өчен тиешле финанс средстволары каралган. Эшкә урнашачак балалар ара­сында социаль яктан уңышсыз гаиләләрдә тәрбияләнүче һәм балигъ булмаганнар комиссиясендә исәптә торучы “авыр” үсмерләр дә бар. Оеш­маларга эшкә урнашкан бала­ларга эш бирүче белән үзәк ара­сында төзелгән килешүдә ка­ралганча, төп хезмәт хакына (ә ул минималь хезмәт хакыннан ким булырга тиеш түгел) өстәмә рәвештә 2250 сум матди ярдәм түләнәчәк.

– Балаларны эш белән тэ­мин итүдә “Төзекләндерү һәм яшелләндерү” унитар предпри­ятиесе, “Мөслим хуҗалыкара төзелеш оешмасы” җәмгыяте, ашлык кабул итү һәм эшкәртү предприятиесе, Иске Карама­лы, Баек, Баланлы, Рус Шуган, Крәш. Шуран авыл җирлекләре аеруча активлык күрсәтә, – ди Дамир Мөхәмәтдинов.

Җәйге эссе көннәрдә бала­лар су буйларында ял итәргә, коенырга ярата. Ләкин күп ва­кыт саклык чаралары турында онытып җибәрәләр.

– Мөслимдә санкцияләнгән коену урыны барлыкка килде. Шунда ук коткару хезмәте дә эшли. Әмма бөтен сулыклар­да да андый урыннар юк. Шуңа күрә су керүнең куркыныч бу­луы турында кисәтүче ан­шлаглар кую кирәк. Балалар өлкәннәр күзәтүеннән баш­ка сулыкларга барырга тиеш түгел, – ди ТР Гадәттән тыш хәлләр министрлыгының рай­он бүлеге әйдәүче консультан­ты Ленар Фәрхетдинов.

Район җирлегендә 4 олы елга ага, 32 буа, 24 күл бар. Сулыкларның һәрберсенә дә сак хезмәте куеп бетерү дә, укытучылар һәм авыл җирлеге вәкилләренең контрольле­ген тәэмин итү дә мөмкин эш түгел, әлбәттә. Монда балалар­га аңлату эшләре алып бару мөһим. Ата-аналар да бала­рын күз уңыннан ычкындыр­маска тиеш. Җәйнең ямен ба­лалар иминлеге белән бәйле күңелсезлекләр бозмасын!

Әлфинур Ногманова.