Җыеннарга барыйк, ярминкә карыйк!

– Үзара салым күләмен һәм башкарасы эшләрне авыл халкы җыеннарда хәл итә. Җыеннар башланыр алдыннан махсус газета да чыгардык. Анда җыеннарны үткәрү урыны, вакыты күрсәтелде, – ди Азат Әхмәтҗанов. – Җыеннарда 18 яше тулган һәм Мөслимдә пропискасы булган һәркем катнаша ала. Оешма-предприятие җыеннарында катнаша алмаганнарга 29 ноябрь көнне, сайлау участокларында үтүче җыеннарда катнашырга була. 
Җыеннар графигы белән райондашларыбыз социаль челтәрләрдә һәм районның рәсми порталында да таныша ала. Халыктан кергән тәкъдимнәр теркәлеп бара. Алар нигезендә Мөслим буенча башкарасы эшләр турында карар чыгарыла. Халык җыеннары нәтиҗәләре белән киләсе атнада таныштырырбыз.
– Район үзәгендә үзара салым җыю буенча җыеннар 28 этапта уза. 29 ноябрь көнне халык җыеннары сайлау участоклары урнашкан биналарда үтә. Һәркем, җыенга килеп, үз фикерен әйтсен иде. Үзара салым программасында Мөслим районы 2013 елдан бирле катнаша. Мөслим үзара салым программасы нигезендә төзекләнде. Бердәм һәм актив булсак, җирлегебезне үстерү юнәлешендә эш дәвам итәр, – ди район Башкарма комитеты җитәкчесенең социаль-мәдәни мәсьәләләр буенча урынбасары Марина Бәдретдинова.
29 ноябрь көнне Мөслимдә көзге ярминкә дә оештырыла. Мөслимнең Банк урамында узачак чарада авыл хуҗалыгы продукциясе, көнкүреш товарлары тәкъдим ителәчәк. Ярминкәдә “Каз өмәсе” күренеше, бәйрәм концерты да оештырыла. 
Ә узган ел җыелган үзара салым акчасына башкарылган эшләр күз алдында – тротуарлар ясалды, яктырткычлар куелды, юл кырыйларына бордюрлар ясалды, Сабантуй мәйданы эшләнде, яңа бассейн янында төзекләндерү эшләре башкарылды. Юлларны җәен-кышын карап тоту өчен дә үзара салым акчасы тотыла.