"Яшүсмер-2015" операциясе. Ниләр эшләнде?

Караучысыз, тәрбиячесез калган яшүсмерләрнең хокук бозуларын профилактикалауда бик күп оешмалар катнашты. Район эчке эшләр бүлегенең балигъ булмаган балалар белән эшләү бүлекчәсе, җинаятьләрне ачу бүлеге, ЮХИДИ, участок уполномоченныйлары, "Маяк" халыкка социаль ярдәм күрсәтү бүлегенең гаиләгә һәм балаларга социаль ярдәм күрсәтү бүлекчәсе, район башкарма комитеты каршындагы балигъ булмаган балалар белән эшләү комиссиясе, опека органнары, район үзәк хастаханәсе, яшьләр белән эшләү һәм спорт бүлеге, мәгариф идарәсе хезмәткәрләре белән берлектә балигъ булмаган балалар белән эшләү бүлекчәсендә профилактик исәптә торучы яшүсмерләргә һәм уңышсыз гаиләләргәконтрольлек итү,ачыклау максатында рейдлар уздырылды.Рейдлар вакытында 31 административ беркетмә төзелде. Алар нигездә әти-әниләреннән башка төнге сәгатьләрдә урамда һәм җәмәгать урыннарында йөргән,спиртлы эчемлекләр куллануда гаепләнгән яшүсмерләргә, бала тәрбияләүдә ата-ана вазыйфаларын үтәмәгәнәти-әниләргә карата төзелде. Гаеплеләргә ТР Административ хокук бозулар турындагы кодексның аерым маддәләре нигезендә штраф билгеләнде. Операция барышында профилактик исәптә торучы 11 яшүсмернең һәм 17 уңышсыз гаиләнең өйләренә барып, әңгәмәләр үткәрелде. Бу чорда 3 уңышсыз гаилә һәм хокук тәртибен бозучы 4 яшүсмер профилактик исәпкә куелды.

Профилактик исәптә торучы 4 бала каникуллар чорында мәктәп яны лагеренда, 2 яшүсмер "Урман иле" ял һәм сәламәтләндерү лагеренда ял итте, 8 бала вакытлыча эшкә урнашты.