Ярминкәләрне көтеп алабыз

4 декабрь көнне инвалидлар ункөнлеге уңаеннан беренче кышкы ярминкә узды.

Ярминкәдә киң ассор­тиментта эре терлек, кош ите тәкъдим ителде. Фер­мер Ирек Хәмәдишинның ыс­ланган һәм тозлы казларын күрше районнардан да алыр­га килгәннәр иде. “Фаиза” ко­оперативы ярминкәдә акмай белән сату итте. Әлеге майны алырга Түбән Кама шәһәреннән дә кайтучылар бар иде. Баш­ка ярминкәләрдәге кебек “Фа­иза” уңганнары ярминкәгә килүчеләрне коймак һәм кай­нар чәй белән сыйлады. Яшелчә, җиләк-җимеш тә кулай бәядән сатылды.

– Ноябрь бәйрәмнәреннән соң тиз арада гына ярминкә булыр дип уйламаган идек. Аллаһның рәхмәте белән оеш­тырганнар бит! Күз төшкән бөтен әйберне дә алдык. Хо­дайга шөкер, пенсияләребез ва­кытында килә, булганы җитеп бара. Бер үтенечем бар – алда­гы ярминкәләрдә сарык итен дә сатсыннар иде! – ди Мәлләтамак авылыннан Өлфәт Мортазин.

Халыкның үтенече урын­лы. Каз, тана ите мулдан бул­са да, ярминкәдә сарык ите са­тучылар ни сәбәпледер юк. Ит рәтләре арасында үрдәк ите эзләп йөрүчеләр дә күзгә таш­ланды. Димәк, үрдәк итенә дә сорау бар. Җимеш сатучы­лар да аз түгел иде. Түбән Ка­мадан килгән сәүдәгәрләр, “чын колбаса” дип, әллә ничә төрдә казылык тәкъдим итте. Ярминкәдә бал сатучылар­га да көндәшләр шактый күп иде. Шул сәбәпле райондашла­рыбызга арзан бәядән бал алу бәхете тәтеде.

– Ярминкәне шимбә көнне оештырып бик дөрес эшлиләр. Әти-әниләр җомга кич хәбәр итә дә, без иртән кайтабыз. Тойгелделәрдән – каймак- сөт, Тугаш фермерларыннан каз алдык. Бездә итекләр бик кыйммәт. Монда 400 сумга ар­занрак булды. Шәһәр кеше­сен акчалы дип, бөтен әйбергә бәяне арттыралар. Ярминкәдән күп итеп җимешләр дә сатып алдык,– ди Яр Чаллыдан кайт­кан Ландыш Шәймәрданова.

Якын-тирә шәһәрләрдән килгән сәүдәгәрләрнең җылы өс һәм аяк киемнәрен дә яра­тып алды райондашлары­быз.Өстән яңгыр явып торуын һәм аяк астының юеш булуын исәпкә алмаганда, ярминкә бик күңелле үтте.

Лилия Шәймиева.

Автор фотосы.