Санкт-Петербург тау унивеститетында укучы якташыбыз Шамил Исламов халыкара "Җир асты байлыкларын файдалану проблемалары" форум-конкурста "Нефть һәм газ чыганакларын комплекслы үзләштерү һәм углеводород чималын транспортировкалау" номинациясендә җиңү яулады.
Аның эше аномаль түбән пласт басымнары шартларында нефть скважиналарын сүндерү технологиясен нигезләүгә багышланган иде.
Халыкара форум Санкт-Петербург тау университетында инде 12 ел рәттән үткәрелә. Талантларны барлый торган әлеге үзенчәлекле мәйданда дөньяның иң көчле техник уку йортларыннан студентлар, аспирантлар, шулай ук профильле компанияләрдән белгечләр катнаша. Чара барышында алар үз казанышлары турында чыгыш ясап кына калмыйча, коллегаларының эзләнүләре белән дә танышалар.
Форум барган өч көндә тугыз секциядә 231 доклад тыңланды. Европа һәм Азиянең 19 иленнән килгән катнашучыларның хезмәтләре минераль-чимал комплекс алдында торган проблемаларның бөтен спектрын колачлый. 350 катнашучының 250се чит илләрнең 40 югары уку йортыннан иде.
Форумда каралган иң мөһим мәсьәләләрнең берсе - тирә-якны саклау. Бу аңлашыла да: җир асты байлыклары белән эшләү технологияләре биосферага тәэсир ясамый калмый. Форумда катнашучылар һәм мәртәбәле кунаклар үз чыгышларында әлеге проблеманы чишү өчен дөнья фәнни мәктәпләренең интеграциясе таләп ителүен ассызыкладылар. Шул очракта гына кешелеккә киләчәк һәм экологик куркынычсызлыкны тәэмин итәргә була.
Шамил Исламов тумышы белән Иске Карамалыдан. Ул күпсанлы конкурслар һәм олимпиадалар җиңүчесе. Аерым алганда, 2015 нче елның октябрь аенда ул Самара техник университеты үткәргән халыкара "Ашир укулары" фәнни-гамәли конференциясе лауреаты булды.
Иң мөһим һәм кызыклы язмаларны Татмедиа Telegram-каналында укыгыз
